مطاعم إستثنائية بقعدة بتحلموا فيها بلبنان!

عم تبرموا ع مطاعم فريدة بقعدات بتفوق توقعاتكن؟ التجارب المميزة كتيرة بلبنان، بس نحنا حبينا نخبركن عن ٧ مطاعم إستثنائية بقعدة بتحلموا فيها حول لبنان!

1. مطعم برج الفيدار، جبيل

مطعم ع شكل جزيرة بقلب البحر! بتلاقوا ع شط الفيدار بجبيل مطعم برج الفيدار، قاعد ع صخرة مع مطل بحري من الخيال! بتقعدوا بتتغدوا وموج البحر من تحتكن! 

الرقم: 008 607 03 

2. مطعم تايغر، المري 

شي مرة تغديتوا بقلب مغارة؟ هالمطعم عمرو حوالي ١٠٠ سنة وعندو إطلالة فوق الخيال. قاعد بقلب مغارة محفورة بالصخر، بيقدم أكل لبناني ومازة ما بتلاقوها وين ما كان. 

 الرقم: 008 979 03 – 352 358 03 – 564 870 04

 3. مطعم قمر، حريصا 

عم تبرموا ع مطرح بمنظر خيالي بكل معنى الكلمة؟ مطعم قمر عندو مطل ع أجمل المناظر الساحلية بلبنان، بتتغدوا من أعالي حريصا وتحتكن الدني كلها.

الرقم: 880 801 03

4.  مطعم جنة الأرز

مطعم جنة الأرز هو مطعم بالهوا الطلق عندو وحدة من أجمل الإطلالات، قاعد على حفّة أعمق وادي بلبنان: وادي قاديشا أو المعروف بوادي القديسين. هالمنطقة مشهورة بأجوائها الجبلية والروحانية الحلوة، فيكن تتغدوا عندن عنجد من فوق السما!

الرقم: 760 743 03

5. مطعم فينيسيا، سن الفيل

فيكن تعيشوا سحر مدينة البندقية من بيروت! هالمدينة التاريخية مشهورة بقنوات الميّ والقعدات بالشخطورة، وانتو فيكن تعيشوا هالتجربة عند مطعم فينيسيا الإيطالي بالإضافة لعشا رومانسي وكاس نبيد وصوت الموسيقى الكلاسيكية. 

الرقم: 540 516 01 

6. مطعم Chapo Ba ، حريصا 

مننصحكن تحجزوا عند Chapo Ba مع حبيبكن وخاصة بالليل، لأنو عندو أجمل منظر ليلي لساحل جونية وبيروت. قعدة مليانة رومانسية مع أضوية المدينة الساحرة بالعتمة. 

الرقم: 400 934 70 

7. مطعم شلالات الزرقا، بعقلين

قارب مليان ورود وقعدة جنب الشلال، فيه أحلى من هيك؟ عدا عن المناظر الخيالي اللي عندن،  الميّ صافية والجو برود والأكل طيب عند مطعم شلالات الزرقا!

الرقم: 301 560 03

أي من هيدي مطاعم إستثنائية حبيتوا؟

لكل القعدات الخيالية، شوفوا قسمنا على الموقع هون.