مهرجان دوما الصيفي: أكل، رقص وفرح وموسيقى (الدخول مجاني)

شو عاملين هالويك-أند؟

إذا بعد ما عندكن فكرة، عنا إلكن مشروع بطير العقل!

مهرجان دوما الصيفي رح يبلش اليوم ويستمر للأحد، وبيوعد بأجواء ما بتنتسى. جهزوا حالكن تطلعوا على ضيعة دوما الساحرة لتعيشوا أجواء الصيف المميزة. مهرجان Street Festival مبلش من الساعة 12 الظهر وبيضل للـ 12 بالليل، يعني يومكن رح يكون مليان نشاطات وفرح.

ضيعة دوما بقضاء البترون من أجمل الضيع الشمالية يلي بعدها محافظة على تراثها القروي وسحرها. مع سوقها الأثري وبيوت القرميد الأحمر، وقربها من محمية تنورين الطبيعية وزيتون بشعلة القديم، دوما بتجمع بين الأصالة والطبيعة بامتياز.

ومن أكتر القصص المحبوبة بدوما، بوظة الزحلاوي يلي بتلقوها بقلب السوق الأثري. السوق بيتألف من 125 محل، أهمهن بيت المونة الدومانية يلي عندو كل شي طيب من زعتر وكبيس لزيت الزيتون والصابون، وحتى حلو الراحة التركي.

شو ناطركن بالمهرجان؟

كتير مفاجآت حلوة ناطرتكن: موسيقى حية، رقص، كيوسكات أكل وشرب، معارض تياب وأكسسوارات، ألعاب للأطفال، نشاطات ترفيهية، وكل هالقصص ضمن أجواء حماسية ورواق دوما الرائع.

والأحلى من هيك؟ الدخول مجاني! رغم الظروف الصعبة، لجنة المهرجان قررت تفتح الأبواب لكل الناس بلا تكلفة، ليكون هالمهرجان فرصة تهربوا فيها من هموم الحياة وتعيشوا لحظات فرح.

جمعوا العيلة والأصحاب، وتوجهوا لدوما لهالمشوار اللي ما بينتسى.

وين: الشارع العام
أيمتى: من 23 آب ل 25 آب
الساعة: من الساعة 5 بعد الضهر للساعة 12 نص ليل
الدخولية: مجانية
الرقم: 420 004 81

شوفوا كمان: شي مرة شفتوا أوتيل مدّور؟ تعرّفوا على هالفندق الغريب بضيعة دوما.