٦ بيوت ضيافة جبلية مش سامعين فيها

إذا كنتوا عم تدوروا على تجربة ضيافة استثنائية بقلب الجبل، فهيدا المقال رح ياخذكن بجولة على 6 من أجمل بيوت الضيافة الجبلية لي مش سامعين فيها بلبنان. هالمحلات بتجمع بين الأصالة والراحة، وبتقدملكن فرصة تهربوا من صخب الحياة اليومية لتغمروا حالكن بالطبيعة والهدوء. رح تلاقوا بكل بيت من هالبيوت الضيافة سحر خاص بيخليكن تحسوا حالكن ببيتكن التاني. تابعوا معنا لتكتشفوا بيوت ضيافة جبلية روعة بتخليكن تعيشوا لحظات ما بتنتسى بين الجبال.

١. بيت الجبل، حاصبيا

إذا كنتوا عم تدوروا على مكان يشبه الجنة بقلب الجبل، “بيت الجبل” بحاصبيا هوي وجهتكن المثالية. هيدا البيت الضيافة بيجمع بين البساطة والراحة، محاط بالطبيعة الخلابة والجبال الشامخة. قعدة عصرية وفيو ما بينتسى على وادي حاصبيا مع بيسين. بتقدروا تستمتعوا بجو رايق بعيد عن الضجة، وتعيشوا تجربة أصيلة بتعكس سحر المنطقة.

الرقم: 264 426 03

٢. Guita Bed & Bloom، العاقورة

بيت ضيافة جبلي مميز حجر مع فيو مميز وغرف شرحة، فيكن تعملوا بيكنيك بجنينة البيت وتقعدوا على المرجوحة وصوت الشجر عم يغمر دينيكن والنسيم العليل ببورد القلب. أجواء هالمحل دافية ورومانسية رح تلاقوا السكينة لي عم تنبشوا عليها بين الشجر وتحت النجوم.

الرقم: 567 050 03

٣. Eden the Cabin، يحشوش

قعدة بقلب الطبيعة وبقلب جبال لبنان الخضرا مع فيو بطير العقل، هيدا البيت قاعد على الشير وعلى كتف الوادي، يعني بتبوردوا على الآخر وشو بدنا نخبركن عن القعدة على البلكون عبكرا الصبح مع أطيب ترويقة بلدية. النومة بقلب هالكوخ الجبلي بتخليكن تنسوا هموم الدني وفيكن هيك تناموا بقلب الطبيعة. وحد هالبيت بتلاقوا محمية يحشوش يلي فيكن تعملوا فيها هايك أو تميلوا على مطعم جلسة ورد المجاور ولي بقدم لقمة ولا أطيب.

الرقم: 636 804 03

٤. بيت البيادر، جران

قعدة حلوة وبسيطة جنب الطبيعة ورواق لأبعد الحدود: الفيو عندن كتير بروق الأعصاب! بهيدي الكابين الخشب، قعدة جبلية وفيها سحر جبلي وجنينة مهضومة بإنتظركن حتى تنسوا كل هموم العالم وأكيد قعدة برا لذيذة وشرحة.

الرقم: 246 513 03

٥. بيت بو يوسف، العذره

بقلب جبال العذره الخضرا، بيت بو يوسف لي هوي بيت ضيافة مليان أصالة ودفا. هيدا البيت بيعطيكن فرصة تعيشوا تجربة لبنانية تقليدية وسط أجواء جبلية منعشة. بغرفو الحجر الشرحة وبإطلالاتو الرائعة، رح تحسوا حالكن بقلب الطبيعة مع كل راحة البال. القعدة دافية ومكنكنة بالشتوية أو بالجنينة وبقلب البيسين بالصيفية، كل موسم إله سحرو الخاص بهيدا المكان.

الرقم: 515 544 03

٦. Skyloft، ترشيش

إذا كنتوا من محبي المغامرة والمناظر الخلابة، هوي المكان المثالي لإلكن. هيدا البيت الضيافة بيتميز بموقعو العالي يلي بيعطيكن فيو بانورامي على الجبال والغيوم. الجو هون بيطير العقل، وقعدة على التيراس وبقلب البيسين بتخليكن تحسوا إنكن فوق الغيوم. تجربة فريدة من نوعها بكل فصل، والراحة النفسية بهالبيت ما بتنوصف.

الرقم: 769 675 71

شوفوا كمان، أجمل مطاعم إهدن مع فيو.