فنانة لبنانية أسطورية بتغني بـ28 لغة، مين هيي يا ترى؟

من أجمل الأصوات اللبنانية على الساحة ويمكن الأجمل على الإطلاق، هوي صوت الفنانة الأسطورية اللي بتغني بـ28 لغة، وصوتها بفوت على القلب من أول ما بتسمعوا. عرفتوا عن مين عم نحكي؟ عم نحكي عن الفنانة اللبنانية عبير نعمة، صاحبة الصوت الملائكي يلي بفوت على قلب كل مين بيسمعوا

ومؤخراً، وبمقابلة حصرية مع بيلبورد عربية، كشفت عبير عن قدرتها الفريدة على الغناء بـ28 لغة، لتكون الفنانة العربية الوحيدة اللي بتغني بهيدا العدد من اللغات واللهجات. أغانيها الرومانسية عم تنتشر بشكل استثنائي على مواقع التواصل، متميزة بنوع موسيقي فريد.

عم تتخايلو عنا فنانة لبنانية بتغني بـ28 لغة؟ صوتها ساحر لدرجة إنو بياخدكن لعالم تاني. عبير نعمة، فنانة بتجمع بين فن الشرق والغرب بأسلوب فريد.

استمدت عبير طاقتها وقدمت قطع موسيقية غنائية من الشرق والعالم القديم، من فلكلور العراق لموشحات الأندلس، ومن تراث سوريا ولبنان ومصر والطرب الأصيل للغنا التقليدي بلغات تركيا وأذربيجان وأرمينيا والهند، وحتى غنت التراث اليوناني والمجري وتراث جزيرة سردينيا. ورجعت بالزمن للغة الآرامية القديمة والسريانية من خلال الترانيم الروحية.

مين هيي عبير نعمة؟

فنانة وباحثة موسيقية لبنانية، عبير حققت إنجازات كتيرة خلال مسيرتها الفنية. عشقها للفن بلش من الطفولة ورتتو من بيها واستمر لحد ما جمعت بين الموهبة والدراسة، وحصلت على شهادة البكالوريوس بعلم الموسيقى بامتياز عام 2011، ومن بعدها نالت الماجستير بنفس التخصص.

شاركت بالعديد من المهرجانات العالمية وأصدرت ألبومات ناجحة وحصدت جوايز كتير متل الموركس دور. غنت ألحان بتمثل ثقافات الشرق الأوسط وأوروبا، ورحلتها الموسيقية واسعة بقدر اللغات اللي بتغنيها.

أغانيها متل “وينك“، “بلا ما نحس“، “بصراحة“، و”لعندو بروح” حققت نجاح كبير. وأدائها للأغاني الطربية الشهيرة متل “شايف البحر شو كبير” للست فيروز و”غريبين وليل” لغسان صليبا و”ما حدا بعبي مطرحك بقلبي” للست ماجدة زادها شهرة واسعة.

عبير نعمة منا بس صوت حلو، هيي رمز للثقافة اللبنانية والإبداع الموسيقي اللي بيجمع بين الشرق والغرب بأسلوب فني ما بيتكرر.

شوفوا كمان، شو الفرق بين إهدن وزغرتا؟ شوفوا معنا.