أجنبية حصدت ملايين المشاهدات ع يومياتها مع تيتا بلبنان

إذا كنتوا ناشطين ع مواقع التواصل، أكيد بتكونوا حضرتوا شي فيديو لمليكة! وإذا لا، خلونا نخبركن عنها. مليكة إرجاشيفا  Malika Irgasheva صانعة محتوى على إنستغرام بتوثق عبر حسابها يومياتها بلبنان. إنتشرت فيديوهاتها بشكل واسع ع السوشال ميديا وحصدت آلاف من متابعين وملايين المشاهدات.

فيديوهات مليكة قدرت توصل وتجذب كتير ناس لسبب واحد واللي هو البساطة. من خلال لقطات لطيفة وفيديوهات كلها دفى، مليكة بتفرجي يومياتها مع تيتا وابنها، من طبخ الكوسا محشي مع بعض، لسرداتن  البيروتية ع البرندا مع فنجان قهوة. شوفوا تيتا هون كيف عم تحضر المعمول: 

من الضاحية، للأشرفية، وكمان صيفي، مليكة بتفرجينا جمال بيروت كلها! وحتى كمان جمال مناطق تانية متل الجنوب، شوفوا فيديوهاتها بصيدا: 

وللصراحة، نحنا كمان إنغرمنا بفيديوهاتها اللطيفة مع تيتا ولحظاتن العفوية اللي بتذكرنا نحنا كمان بذكرياتنا مع ستنا: 

على الرغم من إنو مليكة أوزبكية من قيرغيزستان، بس نجحت توصل صورة لبنان متل ما كل لبناني بيشوفها وبيحس فيها. من اللحظات اللطيفة مع العيلة، لصبيحات منقوشة الزعتر، مشاوي الأحد، الأسواق الشعبية، الشوارع المتواضعة، والحياة اليومية البسيطة بلبنان. 

مع انو زوجها لبناني وكتير بتحب تصورلنا لحظاتها بلبنان إن كان ببيتها أو ببيت التيتا، بس كمان مليكة بتشارك المتابعين جزء من تراث ومطبخ قيرغيزستان الغني  من خلال وصفات الأكل التقليدية.  

منتمنى تكونوا حبيتوا فيديوهات مليكة ع قد ما نحنا حبيناهن! إذا بتحبوا تابعوها وتشوفوا باقي فيديوهاتها، شوفوا حسابها هون. 

شوفوا كمان، بونجوس متلجة: بوظة الطفولة اللي كل لبناني معلّق فيها!