“الهريسة ع النار”… شو هني عادات عيد السيدة بلبنان؟

قرب عيد السيدة بـ15 آب، ومعو بتقرب المهرجانات والحفلات اللي كلنا مننطرها بفارغ الصبر. بس قبل ما نبلش الاحتفالات، حبينا نذكركن ببعض العادات والتقاليد اللي بتخلي هالعيد مميز ومحبوب بضيعنا اللبنانية.

^{Credits: alquds}

أجواء العيد

الكل معزوم: أول شي، الكل بيكون معزوم على العيد، الكبار والزغار ومن كل الأديان والمناطق. بتحسوا الضيعة كلها قلب واحد، وممنوع حدا يفل بكير ويسرب ع بيروت! كل العالم بتبقى بالضيعة لآخر الليل، والنومة عن آهل الضيعة واجب.

^{Credits: ealaf trip}

النضافة والشطف: قبل العيد بيومين، الضيعة كلها بتنشطف! من البيوت للشوارع لساحة الكنيسة. هالتقليد قديم، بيعملوا مش بس ليكون كل شي نضيف، بس كمان ليغسلوا القلوب من الأحقاد والكراهية. الكل بيستعد للعيد براحة بال.

^{Credits: A7la Balad Lebnen}

الهريسة ع النار: الهريسة هي ملكة الطاولة بالعيد. هيدي الأكلة بركة العيد، وهي كناية عن لحم الغنم المسلوق مع القمح المنكه بالتوابل والبهارات الطيبة. وكل ضيعة عندها طريقتها الخاصة بالتحضير، وكل واحد بيقول طريقتو الأحلى. وما مننسى عرانيس الدرا اللي بتوزع ببعض الضيع نهار العيد للكل، كبار وزغار.

^{Credits: Loubnan Al Siyaha- Lebanon Tourism Magazine}

المهرجانات والاحتفالات: الفرح بيعم الضيعة مع حفلات موسيقية ومهرجانات بيحييها فنانيين بيجوا من كل المناطق. والمغتربين اللبنانيين بيلاقوا هيدي الفرصة المثالية ليرجعوا ويحتفلوا مع أهاليهن. الموسيقى، الدبكة، والضحك، التياب الجداد بيملوا الساحات.

الطلعة على الضيعة: بهيدا النهار، الكل بيطلع على الضيعة. ما في حدا بيبقى بالمدينة. هيدي مناسبة كل واحد بيرجع لجذورو وبشوف أهلو وأصحابو، وبعيشوا أجواء العيد يلي بتتكرر كل سنة.

ليلة العيد: ليلة العيد، الكل بيجتمع على عشا قروي بساحة الضيعة أو ساحة الكنيسة. المشاوي والقصص الطيبة ما بتخلص، والضحك والفرح بكون موجود.

زياح العدرا: قبل العشا، بيبلش زياح العدرا، بتشوفوا الكبار والزغار عم يبرموا بشوارع الضيعة، وعم يرشوا الورد والرز على العدرا، بهيدا الزياح اللي بيرمز للأمل والسلام.

نهار العيد: الكنيسة بتكون مليانة مؤمنين، والكل عم بصلي ويطلب البركة. وبعد الصلاة، بيتجمعوا العيلة على المشاوي وأطيب الأكلات، والكل معزوم، وممنوع حدا يقول “لاء” للعزيمة.

عيد السيدة مش بس مناسبة دينية، هو كمان فرصة للتعرف على التراث اللبناني. من الأكلات الشعبية، للموسيقى والمهرجانات، للطقوس القديمة، بتلاقوا كل شي بيعبر عن هوية لبنان.

خلينا نحافظ على هالتراث الجميل، ونستمر بتقديم الفرح والمحبة لكل الناس.

شوفوا كمان، شو الفرق بين إهدن وزغرتا؟ شوفوا معنا.