لقينالكن مطعم بقلب مغارة عمرو ١٠٠ سنة!

بتعرفوا إنو مشوار ربع ساعة من بيبعدكن ع عجقة بيروت وبعيّشكن جو الجبل؟ من ضيعة بيت المري الحلوة، وجنب دير القلعة بتلاقوا مطعم لبناني بيقدملكن تجربة إستثنائية مش عايشينها من قبل. شي مرة تغديتوا عند مطعم بقلب مغارة؟ مطعم تايغر هو مطعم تراثي بقلبو مغارة، بيقدم أكل لبناني بيشهي وإطلالة خيالية. 

لقمة تراث من قلب مغارة!

هالمطعم يمكن من الأقدم بلبنان، صرلو فاتح من سنة ١٩٣٥، يعني حوالي ال ١٠٠ سنة ومرق من جد الجد ع عيلة لبنانية كريمة. من أروع القعدات اللي ممكن تشوفوها، غدا بقلب مغارة، سقفها صخر ، محفورة بالجبل، وبتطل ع منظر خيالي من الشجر.

Photo credit: Elie Chatry

زيارة هالمطعم ما وقفت بس ع المغارة، بس كمان لأنو عندو إطلالة للساحل بتشوفوا منها بيروت كلها. دوقوا اللقمة اللبنانية مع منظر غروب الشمس والبحر الصافي، قعدة عنجد من فوق الغيوم بتروق الراس وبتفرّح القلب. 

مطعم تايغر بيتفنن بأطباقو! 

Photo credit: Elie Chatry

وهالعيلة أبدعت بالأكل التراثي وقدمت الأطباق اللبنانية ع طريقتن الخاصة! عندن منيو مشكّلة من أطياب المطبخ اللبناني ليعيشوكن التراث بكل لقمة وعلى سفرة مفروشة أشكال وألوان من اللي بيخطر عبالكن، إن كان  مازة لبنانية، للسلطات، مشاوي، اللحمة النية، العرق البلدي، وغيرن.

من أميّز أنواع المازة اللي ممكن تجربوها عندن هي اللبنة، مخلوطة مع ١١  نوع من الخضرة و المكسرات. كمان بيتميزوا بطبق الدجاج المشوي مع صوص سرية، وبس اللي جرّبها بيعرف أديه طيبة! وخبرونا، إنتو رح بتجربوها؟

بتلاقوا مطعم تايغر جنب دير القلعة، ضيعة بيت مري وبيفتح من التلاتا للأحد. وما تنسوا تابعوا حسابن على الإنستغرام هون. 

للتواصل، فيكن تتصلوا على الرقم: 008 979 03 – 352 358 03 – 564 870 04. 

مين بتعزموا ع هل مطعم بقلب مغارة بلبنان؟

شوفوا كمان، ٣٣ محل كوكتيل فريش لازم تجربوهن بلبنان!