شو قصة الجسر السري يلي تحت الأرض بطرابلس؟

صح متل ما عم تسمعوا! جسر تحت الأرض بمنطقة طرابلس وهوي الجسر السري اللي ما حدا بيعرف في! كان هالجسر قديماً للتنقل بالترامواي لنقل البضاعة وكان بيوصل لبنان بأوروبا وبغير مناطق وبلدان.

^{Credits: مركز طرابلس لإحياء التراث الثقافي}

كيف تم إكتشاف الجسر السري؟

ما حدا كان بيعرف بهالجسر لحد ما تم اكتشافو بالصدفة نهار 25 تموز 2018. وهني عم يحفروا الطريق الغربي اللي جنب كورنيش نهر أبو علي، طلعت جرافات شركة جهاد العرب عالـ “قنطرة” هيك كبيرة من حجر ومعقودة من جوا ومدعمة بسور عريض.

ما كان في حدا عارف شو هالشي يلي طلع. في ناس قالت إنو هيدا نفق مسقوف بيوصل لقلعة طرابلس، تانيين اعتقدوا إنو يمكن يكون قناة مي قديمة.

طلع الدكتور خالد تدمري، رئيس لجنة الآثار والتراث ببلدية طرابلس وحط النقط عالحروف بهيك قضية بالتقرير التفصيلي يلي عملوا. استند الدكتور تدمري على صور قديمة كتير ووثائق تاريخية وخرايط عريقة موجودة عندن وأثبت إنو هالقنطرة والسور هني بقايا “جسر الترامواي العثماني”.

هالجسر عندو تاريخ ع العثمانيين!

كان جسر الترامواي العثماني بيوصل بين الضفتين لنهر أبو علي من عند شارع الزاهرية لمدخل شارع سوريا. وكان تالت جسر تاريخي بيمرق فوق مجرى النهر بعد جسرين تانيين هني جسر السويقة وجسر اللحامين. هالجسر الجديد انبنى تقريباً آخر القرن 19 خصيصاً كرمال يمرق عليه خط عربات الترامواي الحديدي بأيام السلطان عبد الحميد التاني.

^{Credits: Aliwaa}

كان جسر الترامواي العثماني جزء من مشروع خط الترامواي الحديدي الطرابلسي يلي كان أول مشروع سكك حديدية بكل المنطقة! هيدا الخط لعب دور كبير وأساسي وخلا مرفأ طرابلس يصير المرفأ الأساسي بالمنطقة كلا وكانوا يصدروا من خلالو كل البضاعة الزراعية والصناعية لأوربا وغير مناطق والعكس.

للأسف، المنطقة يلي فيها جسر الترامواي العثماني تعرضت للتخريب من حوالي 60 سنة. هيدا الشي أدى لتغيير مجرى النهر وتغطية حوالي 300 متر من الجسر.

جسر الترامواي العثماني هو شاهد حي ع تاريخ طرابلس العريق. و بهالوقت اللي واجه في الجسر الإهمال والتخريب بعدنا منتذكروا كرمز للتطور والازدهار يلي شافتو المدينة بأيام زمان. أولكن رح ترجع تشوفوا طرابلس؟

شوفوا كمان، بتتذكروا حلا واحتلا: وين صاروا نجومو اليوم؟