بتتذكروا حلا واحتلا؟ وين صاروا نجومو اليوم!

حلا واحتلا برنامج ألعاب وتسلية ومغامرة مشوق قدموا طوني بارود وكارن دير كالوستيان. كان مطلوب من الفريقين يكملوا سلسلة من التحديات القوية ليتمكنوا من احتلال القلعة “فيليندرا، راس النمر”.

هوي النسخة اللبنانية لبرنامج فرنسي بعنوان “Fort Boyard وانعرض على شاشة الLBC من سنة 2002 لسنة 2003 وهوي من إعداد ميشال سنان ولارا فاضل بإدارة وإخراج فرنسي.

قلعة حلا واحتلا عبارة عن قلعة وسط البحر وبهاللعبة بيمرق الفريق بعدة مراحل ضمن الحلقة الوحدة لي بتخولو يوصل للنهائيات ويوصل للكنز الموجود. وجسد الممثل اللبناني غابريل يمين شخصية “العالم فراس” يلي بساعد الفريق يحل الفوازير تبعو.

وين صاروا نجوم حلا واحتلا اليوم؟

١. طوني بارود

إعلامي ولاعب كرة سلة لبناني سابق. دخل مجال الإعلام عبر شاشة الLBC من خلال التعليق على مباريات الباسكت ورجع قدم برنامج متعلق بالرياضة، عام 2002 بلش بتقديم برامج الألعاب والبرامج الفنية وأولها كانت مع المخرج سيمون أسمر. تجوز من ملكة جمال لبنان كريستينا صوايا وعندو منا ولدين دياماريا وجورجيو ولكن رجعوا انفصلوا بعد سنين. من البرامج لي شارك فيها على شاشة الLBC: عالباب يا شباب، مين بيزيد، اكتشفنا البارود، حفل انتخاب ملكة جمال سنة 2007، حفلات راس السنة، نقشت، أحلى جلسة وشرقط البارود (على صوت الغد). ومن بعدها نتقل على شاشة الMTV وقدم عدة برامج: بطولة الأندية العربية، محلولة، تعا ننسى، فرصة تانية، إنت وحظك وحالياً هوي بين لبنان ودبي وقدم برنامج مميز وقت رمضان “ضوى يا قمر”.

٢. كارن دير كالوستيان

انضمت سنة 1996 للLBC كمذيعة ربط ورجعت قدمت برامج متنوعة من برامج ومسابقات ومنوعات بالإضافة للحفلات والسهرات على شاشاتها، من البرامج لي برعت فيها: مين قدم مع الفنان فادي شربل، حلا واحتلا مع طوني بارود، الوادي. ورجعت برعت بتقديم برنامج “لاقونا على الساحة” على شاشة الOTV إلى جانب الممثل يوسف حداد وقدمت كمان على تلفزيون الكويت “معرض عروس الخليج الكويت” مع ميشال قزي. درست علاقات عامة بجامعة College Of The Canyons بلوس أنجلوس، وحازت على شهادة البكالوريوس بالشؤون الدولية والخدمات الديبلوماسية من الجامعة اللبنانية الأميركية. وبعد التخرج اشتغلت بوزارة الإقتصاد والتجارة وبالسافرة البلجيكية بلبنان. والمعروف عنها إنها بتحب الرياضة كتير وبتدرب كمان ونحنا ناطرينها بعمل مميز لأن الشاشة اشتاقتلها.

٣. إيف مارشيسو

جسد دور دعبول أو “la boule” بالبرنامج بالنسختين الفرنسية واللبنانية، انضم للبرنامج عام 1994 ولكن بعد مرور السنين مرض بالسرطان وتوفي سنة 2014 بعمر 62 سنة.

٤. غابريال يمين

مخرج ومؤلف وموسيقار وممثل، صاحب الرقم الصعب والأدوار المركبة الصعبة، شارك بلجنة تحكيم ستار أكاديمي وكان إستاذ الدراما بالأكاديمية وشارك كمان ببرنامج رقص النجوم على شاشة الMTV، ترك بصمات مهمة بعالم التمثيل بلبنان وقدم ميات الأعمال المسرحية والتلفزيونية والسينمائية من ضمنها ٧٣ ترجمة مسرحية و٦٠ فيلم قصير و١٤ عمل مسرحي وموسيقى. من الأعمال لي قدمها: بيت خالتي، نيالك بعدك صابر، مسرحية بنت الجبل، أبرياء ولكن، فرضاً إنو مسرحية، ورد جوري، فيلم جود مورنينغ، مسرحية حكي رجال، فيلم هردبشت، مسلسل عرابة بيروت، مسلسل 2024 وكان آخر أعمالو وشارك كمان مؤخراً بمسلسل نظرة حب. عانى من مرض السرطان من سنين ولكن انتصر وهو مجوز من السيدة سندريلا حداد.

شوفوا كمان، بتتذكروا نجوم SLCHI: وين صاروا اليوم؟