وين فيكن تعملوا حمام تلج بقلب لبنان؟

مشوبين كتير والشمس كتير قوية وفي رطوبة كتير وداق ع خلقكن ومش عارفين كيف بدكن تبوردوا؟ صار لازم تعملوا تجربة حمام التلج يلي صار فيكن تعيشوها عند هول المحلات بلبنان.

١. الفندق، معاصر الشوف

عبارة عن أوتيل مميز وبيت ضيافة ومطعم عندو قعدة ساحرة بالشوف، فيكن تنقوا شو عبالكن، تناموا بالأوتيل أو ببيت الضيافة أو بس تزوروا المطعم، تاكلوا لقمة وتعملوا كزدورة. والسنة رجعوا يعملوا تجربة حمام التلج يلي فيها فوايد كتيرة صحية وجمالية وبتمنحكن شعور حلو كتير. من فوايد حمام التلج بقلل الإلتهاب والتوتر، بيحسن الدورة الدموية، بيقوي المناعة، بيخلي العضل يشفى أسرع، بشد وبيصفي البشرة، بيقلل التوتر والقلق وبيحسن النوم.

الرقم: 451 350 05

٢. Rest House Tyr Hotel & Resort، صور

أوتيل وبحر وبيسين ومطعم، فيكن تقصدوا لتقضوا نهار بسلي على البيسين وتعيشوا تجربة مميزة. وهلق صار فيكن تعيشوا تجربة فريدة من نوعها لازم تعملوها هالصيفية يلي هيي حمام التلج بالتعاون مع mcsfitlife. هيدا نشاط المهضوم عندو كتير فوايد، بشد البشرة، بفعل الدورة الدموية، بزيد نسبة حرق الدهون وبطلع كل التوتر والوجع من الجسم.

الرقم: 000 742 07

٣. Blubay، البترون

قضوا نهار على شط، تشمسوا، تسبحوا، وكلو شي خفيف. بعدين، لأنو ما في أحلى من تجربة جديدة وخارجة عن المألوف، جربوا حمام التلج المميز اللي عم يقدموا شط Blubay بالتعاون مع Polarice. وبعز الشوبات والشمسات عيشوا تجربة حمام التلج بنص البحر، هالتجربة رح تخليكن تريحوا أعصابكن وكل عضلة بجسمكن بطريقة سريعة وفعالة وتشدوا جسمكن بطريقة كتير صحية وسريعة.

الرقم: 944 149 76

ملاحظة: هالتجربة مش لازم يعملها حيلا حدا عندو سكري أو مشاكل بالقلب.

شوفوا كمان، هيك أسعار الدخولية على أشهر المسابح والشطوط بأنفه وشكا والهري.