هيدا رأي ناصيف زيتون بالحب والجازة من دانييلا رحمة!

فاجأ الفنان السوري ناصيف زيتون الجميع بتصريح رومانسي بعد زواجو من النجمة اللبنانية دانييلا رحمة. أكد ناصيف إنو الحب رسالة سامية ما بتعترف بالحدود ولا بالفروقات، ومش بس هيك قال إنو “لبنان مش بس بلدو التاني، صار صهرو للبنان بفضل دانييلا!”

بالتفاصيل، علق الإعلامي اللبناني النشيط ريكاردو كرم على عرس الثنائي الرائع عبر تغريدة على موقع “إكس” وكتب ريكاردو: “بشوف من نظرات ناصيف ودانييلا إنو واقعين بحب بعضن! هالجازة هيي الأمل بعينو، هيي الشجاعة، هيي خلطة حلوة بين ثقافتين عظيمتين. هوي عرس للوحدة بالتنوع، وصوت ضد الكراهية والتمييز!”

وأضاف ريكاردو: “زواج ناصيف ودانييلا هوي دليل على إنو الحب أقوى من أي شي. الحب بيعبر الحدود، الثقافات والنزاعات. الحب هوي القوة اللي بتقدر تغلب على أي عقبة بحياتنا!”

ما تأخر ناصيف زيتون عن الرد على كلام ريكاردو بكلمات مليانة عاطفة: “‌‎أستاذ ريكاردو… شكراً من القلب على التهنئة وعلى مقاربتك المميزة للموضوع و هيدا الشي مش جديد عليك. ومتل ما قلت الحب رسالة سامية ما بتعرف أي شكل من التفرقة. أنا اليوم مش بس بلدي التاني لبنان… صرت صهرو كمان!”

بسبب الإقبال الجنوني على حفلتو بمهرجان إهدنيات الدولي، قررت الإدارة تضيف ليلة تانية لناصيف!

بالإضافة لسعادتو الشخصية، لناصيف نجاح مهني لازم يحتفل في كمان. بسبب زيادة الطلب، مهرجان “إهدنيات الدولي” عم يضيف ليلة تانية لناصيف زيتون هالصيف كجزء من فعاليات مهرجان إهدنيات.

بالتفاصيل، إدارة المهرجان أعلنت الخبر الحلو على “إنستغرام”، وحكت إنو تذاكر الحفلة يلي رح يحييها ناصيف زيتون، ‏بتاريخ ٢٥ تموز كجزء من فعاليات مهرجان إهدنيات الدولي، نفدت بشكل كامل. كرمال هيك، قررت إدارة المهرجان تضيف حفلة تانية “بتاريخ ٢٦ تموز”، بخطوة كانت مفاجأة حلوة لجمهورو ومحبينو.

ما خلصت الأخبار الحلوة بعد! تصدر ناصيف زيتون ورحمة رياض قائمة الأغاني الأكثر استماع على أنغامي بغنيتن الجديدة “ما في ليل”. أكتر من تلات أشهر مرقوا عى طرح الغنية، بعدها محافظة عى صدارة اللوائح!

رحلة ناصيف زيتون مميزة من أول يوم طل علينا بعد ما نال لقب ستار أكاديمي ٢٠١٠. صوتو الحنون وحضورو القوي على المسرح خلو يصير واحد من أهم نجوم العالم العربي. فنو ما بيوقف عند حدود أي بلد، منعتبرو بلبنان منا وفينا ومش بس صهرنا هوي إبن البلد، جمع بين الناس من كل أنحاء الوطن العربي. وزواجو من دانييلا رحمة هوي دليل عقوة الحب يلي بيقدر يتغلب على كل شي!