تجربة مهضومة لكل محبي الكلاب، صار إلكن كافيه!

مين بحب الكلاب؟ إنتو مغرومين بهالحيوانات اللطيفة والأليفة؟ سمعوا هالخبرية المهضومة.

صاروا محبي الكلاب قادرين يستمتعوا عند Toi Moi Et Le Chien بمشروباتن وقهوتن المفضلة.

نحنا متأكدين إنو كلبكن تعب من القعدة بالبيت كل النهار وبحاجة يضهر لشي محل يغير جو.

ونحنا حبينا إنو الكافيه مصمم ليخلي الكلب يحس بالراحة. مش بس فين ينطوا ويلعبوا على راحتن، هيدا المكان عندو كراسي خاصة إلن يرتاحوا عليها وهني ناطرين طلبيتن. قدي مهضوم هيدا الشي؟

لازم تجربوا عند هالكافيه الميكس الفريش من الفواكة والماتشا والليوموناضة ومش بس القهوة، وشو في أطيب من مشروب الفريز بالنعنع. وحزروا شو؟ بجيبوا شي treat مهضوم لكلبكن يلتهي في إنتو وقاعدين عم تشربوا.

يعني صار فيكن تضهروا برات البيت مع كلبكن حتى لو حدا من أصحابكن ما إلو جلادة يروح معكن بدون ما تحسوا حالكن وحيدين. ومش بس هيك، كلبكن رح يتعرف ويعمل أصحاب.

هلق إذا ما عندكن كلب وحلمكن يصير عندكن كلب بالبيت وأهلكن ما عم بخلوكن، صوتوا تعرفوا وين تروحوا.

العنوان: جل الديب
الرقم: 741 342 81

شوفوا كمان، بوظة رح يصير عمرها 100 سنة: تعرفوا على بوظة سالم.