بتتذكروا نجوم SLCHI: وين صاروا اليوم؟

س ل شي برنامج كوميدي ساخر، انعرض على شاشة ال mtv لفترة طويلة وهوي بعالج مشاكل ومعاناة المجتمع اللبناني على مختلف الأصعد بأسلوب الكوميديا السودا يلي كانت بتحول همنا اليومي لنكتة بتضحك المشاهد على حالو. لهيك اليوم حبينا نرجع نتذكر أهم الممثلين لي كانوا ب س ل شي وحبيناهن وصاروا جزء من ذاكرتنا الجماعية بلبنان.

١. فادي رعيدي

عندو قدرة كبيرة على تقمص شخصيات صعبة ومختلفة عن بعضها، متل شخصية “يوسف قليقل” صاحب الرئيس الأميريكي بيل كلينتون و”فاديا الشراقة” الشخصية المضحكة والمميزة يلي صارت نموذج شهرة كبيرة بسبب أخبارها وصبحياتها. ومن الشخصيات يلي برع فيها كمان شخصية “بيبو” وكمان شخصية “جان لوك” يلي جهلان وبيو ما بيفهملو راسو يلي بمثل شريحة من الشباب اللبناني الضايع. فادي رعيدي تخصص بالهندسة الداخلية وهوي بالسنة التالتة من دراستو الجامعية بلش تصوير س ل شي سنة 1994. كل الشخصيات يلي ابتحرها راودتو من وقت ما كان زغير وصار يجمعها ويكتبها ورجع بلش يمثلها. ومن بعد ما سكرت المحطة بقرار من الحكومة اللبنانية سنة 2002، شارك فادي بالعديد من الأعمال المسرحية لحديت ما صار عندو فادي رعيدي شو 1 وبعدو متابع لليوم وكمان عمل نقلة نوعية عبر برنامجو “جنون” على الجديد يلي تميز بتقديمو لحالو.

٢. عادل كرم

ممثل ومقدم برامج لبناني إشتهر بالسكيتشات الكوميدية متل ببرنامج “س ل شي” و”لا يمل” ومن بعدها “ما في متلو” . قدم برنامج هيدا حكي من سنة 2014 وبسنة 2018 قدم برنامج بيت الكل على ال mtv لي أخد شهرة كبيرة. تجوز من إختو لوسام حنا وعندو ولد منها إسمو شربل، رجع تجوز من التونسية فريدة بن لطيف وصار عندو منها بنت إسمها كيمبرلي. شارك بأعمال كتيرة سينمائية تلفزيونية ومسرحيات وأهمها “سكر بنات”، *قضية رقم 23″، “الهيبة الرد”، “نقطة وانتهى”. وهلق مؤخراً قرر يوقف على المسرح مع جورج خباز بمسرحية جديدة رح تنعرض بالكازينو لمدة شهر من بعد ما مثلو سوا فيلم “أصحاب ولا أعز”.

٣. نعيم حلاوي

ممثل وكاتب كوميدي لبناني بلش مسيرتو ككاتب ومقدم برامج بإذاعة جبل لبنان سنة 1980 ورجع إشتهر بالعديد من البرامج الكوميدية متل “SLCHI”، “لا يمل” و”ما في متلو” وظهر بعدد من المسلسلات والأفلام متل فيلم “أبو رياض مين قدو” سنة 2008 ومسلسل “خدنا بحلمك” سنة 2009. ومن الشخصيات يلي أداها ببراعة شخصية “أمين عمين” لما كان بارع بصناعة الأغاني لي بتحكي عن الوضع متل “أوم بوس تريز” لي نشهرت كتير. ورجع نجح بدورو ب”لا يمل” ويلي رجع تحول لمسرحية “لا يمل ستاند أب كوميدي” ورجع مرة جديدة على شاشة ال mtv مع نفس طاقم العمل لكن بحلة جديدة للبرنامج لي صار “ما في متلو” وهوي اليوم عندو برنامج لإختيار أفضل صوت بعد ما تم اختيار المشتركين ببرنامج عبر إذاعة “One FM” لي عم تقدمو أنابيلا هلال ,ورح يطل كمان ب 11 الشهر بستاند أب كوميدي مع رولا شامية ب O Beirut.

٤. طوني أبو جودة

ممثل ومذيع لبناني تخرج من جامعة ال ALBA بعد ما درس فنون جميلة، تجوز من الممثلة ومقدمة البرامج كارلا حداد وعندو منا بنت وحيدة “ليا” وانفصل عنها عام 2020 بعد زواج استمر 16 سنة. قدم عدة برامج كوميدية منها برنامج” CBN” على شاشة MBC وبرنامج “يا ليل يا عين” على شاشة LBC مع كارلا وربح بلقب برنامج “ديو المشاهير” بالموسم التالت. ورجع قدم برنامج “شكلك مش غريب” على MBC 4 وبسنة 2023 قدم برنامج “يا فيل، يا ريل” على شاشة الجديد. وشارك كمان بعدة مسرحيات منها “كوميدي نايت”،” laugh story” وأفلام متل “كاش فلو”. وطوني متعدد المواهب، مقلد بارع لعدد كبير من المشاهير وأيضاً بغني بتلات لغات، العربي، الفرنسي والإنكليزي. ورح يطل كمان ب 18 الشهر بستاند أب كوميدي مع أمل طالب ب O Beirut.

٥. رولا شامية

ممثلة لبنانية كوميدية محبوبة، بلشت مشوارها بالكويميديا SLCHI وبعدها ب “لا يمل” بكل أجزائو و”ما في متلو”، شاركت كمان، بالمسلسل اللبناني الكوميدي “خدنا بحلمك” ومثلت بمسلسل “أبو رياض coffee shop” مع عادل كرم وعباس شاهين وكمان بمسلسل “أبو رياض مين قدو”. تجوزت من رودي سعد سنة 2019 وطلقوا بعد سنة. شاركت بديو المشاهير وبعدة مسلسلات متل “والتقينا” و”أحلى الإيام”. وهي هلق عندها برنامج على أغاني أغاني إسمو “ولعانة”. ورح تطل كمان ب 11 الشهر بستاند أب كوميدي مع نعيم حلاوي ب O Beirut.

٦.ناتالي نعوم

مذيعة وممثلة لبنانية عندها كمان خبرة بمجال إعداد البرامج، انشهرت من ورا برنامج “س ل شي” على ال mtv وقدمت من بعدو برنامج “ناتالو” على الجديد وشاركت بالتمثيل بفيلم” SL Film”. تجوزت من المخرج شادي حنا، وعندهن 3 ولاد، قدمت كمان مسرحية “من كفرشيما للمدفون” بشباط 2024 لي رجعت تجدد بموعد جديد. وهي اليوم منتجة منفذة بال “الدولية للإعلام”، بتعد برامج المنصة وبتساهم بطرح مواضيع بتهم اللبنانية.

شوفوا كمان، ممثلين غنوجة بيا: وين صاروا اليوم؟