أهم المهرجانات يلي عم تصير هالويك-أند بلبنان!

شهر حزيران عم يودعنا وبيحمل معه بآخر أيامو الحلوة كتير مهرجانات ومناسبات حلوة رح تنبسطوا فيها كتير!

١. مهرجان ضهور الشوير

ببلش المهرجان اليوم ورح يضل لنهار الأحد ورح يتضمن سهرات غنائية، ألعاب ومسرحيات للولاد ومطاعم ومحلات الضيعة وسوق الأكل يلي رح ينباع في المنتوجات الضيعيجية، الفواكه ومونة البيت شغل الضيعة وأشغال يدوية وحرفية. وأكيد الدخول مجاني! يعني فيكن تجمعوا أصحابكن وكل الناس يلي بتحبوهن وتستكشفوا هالضيعة الحلوة وتتمشوا وتاكلوا لتشبعوا وتشتروا كل شي بيخطر على بالكن. الولاد كمان رح يتسلوا كتير، في إلن ألعاب ونشاطات وقصص كتير مهضومة. المهرجان من تنظيم Street Festival.

وين: الطريق العام
أيمتى: من 28 حزيران ل 30 حزيران
أيا ساعة: من الساعة 5 بعد الضهر للساعة 12 بالليل
الدخولية: مجانية
الرقم: 420 004 81

٢. Byblos en Blanc et Rosé

على مينا جبيل الأثري ناطركن مهرجان النبيد بالأبيض والزهري بنسختو التاسعة، بالتعاون مع بلدية جبيل، رح يتخلل المهرجان عرض tiger show وبرنامج فني بشارك في فنانين مشهورين متل “ألين لحود” و”منال ملاط”، وخلال المهرجان رح يتمكنوا الحاضرين من تذوق النبيد واكتشاف كيفية معرفة مكوناتو وطريقة تصنيعو.

وين: سنسول جبيل
أيمتى: من 27 حزيران ل 29 حزيران
أيا ساعة: من الساعة 7 بعد الضهر للساعة 12 بالليل
الدخولية: 12$
الرقم: 777 546 09

٣. يوم الموسيقى بالبترون

رح يصير بقلب بيت المغترب اللبناني أمسية موسيقية ب4 لغات، الإنغليزي، الفرنسي، الإيطالي والإسباني مع قعدة رومانسية ساحرة عند 4 مطاعم يلي هني Apetito Mediterraneo وFat Monk و Conut. انبسطوا بتجربة فريدة بتجمع بين الموسيقى والأكل الطيب على وقع أنغام عالمية بنص سوق البترون.

وين: بيت المغترب، البترون
أيمتى: ال 27 حزيران ل 30 حزيران
أيا ساعة: الساعة 8 بالليل
الدخولية: مجانية بس المطاعم عاملين formule

الرقم: 631 634 03

٤. مهرجان البيرة بالبترون

روحوا على بحر Snap Beach بالبترون لأن عاملين مهرجان للبيرة، رح يكون في بيرة قد ما بدكن وبرامج تسلية مع قعدة على وكيوسكات أكل وشرب وحلو. ما بتكمل الفرحة من دون أجواء الفرح والبسط وأكيد الأكل الطيب ما بيكفي لحالو، كرمال هيك رح يتخلل المهرجان عروض موسيقية حية.

وين: Snap Beach، البترون
أيمتى: من الجمعة 27 حزيران
أيا ساعة: من الساعة 12 الضهر للساعة 6 بالليل
الدخولية: 25$

الرقم: 214 888 81

شوفوا كمان، أهم حفلات شهر تموز لصيف ٢٠٢٤ بلبنان!