حزروا شو؟ جورج خباز أعلن عن موسم جديد من عبدو وعبدو

عنجد مش عم نمزح حلمنا لي راودنا سنين وسنين رح يتحقق! أعلن الممثل الكبير جورج خباز من بعد التكريم من قبل جامعة الUSEK بالكسليك عن موسم جديد من عبدو وعبدو يلي كلنا منحبو ولي كلنا حاضرينو إعادة فوق ال10 مرات! وكل مرة بس نحضروا منحس حالنا عم نحضروا لأول مرة.

وهالخبر شفنا على موقع الفن على تيكتيوك من بعد ما عملوا مقابلة مع جورج خباز. قال كان بعدو بالحديث مع يورغو شلهوب وقرروا يعملوا موسم تاني من عبدو وعبدو بس بعد مش عارفين إذا رح يكون مسلسل أو فيلم سينما. بس نحنا منقلن يا ريت بكون مسلسل وفيلم هيك منربح شوفتن مرتين ومنشبع منن على المزبوط لأن عنجد الشاشة اللبنانية اشتاقت كتير ليورغو واشتاقت كتير لجورج خباز وبحاجة لهل ضحكة البريئة لي كانوا يعطونا ياها بكل مرة منشوفن فيها.

بس ما حسموا القرار لغاية هلق. أولكن رح يكون مسلسل جديد؟ أو فيلم سينما؟ ما حدا عارف لهلق. بس نحنا منحب نشوف جورج ويورغو سوا على الشاشة، بمسلسل أو فيلم لأن الشاشة اللبنانية اشتاقت كتير لضحكة يورغو وجورج خباز.

لي كنا نحبو بالمسلسل إنو كل حلقة بتحكي قصة شكل. وكل قصة بتضحك أكتر من التانية وفيها مغامرة جديدة لولاد الخالات.

بتتذكروا شو قصة المسلسل؟

بطولة الممثل القدير جورج خباز ويورغو شلهوب بيحكي عن مغامرات ولاد خالات عايشين سوا ما بيشبهوا بعض بشي! بس بحبوا بعض بطريقة كتير مهضومة. عبدو دريس وبقضي وقتو مع الكتاب ومغروم ببنت إسمها ميمي بس ما بيعطيها وج لما يلتهي عن درسو. أما بودي فهوي العكس تماماً، ما بحب الدرس أبداً وبقضي معظم وقتو من وحدة لوحدة عم يتسلى ويجغل على البنات.

كان مسلسل كتير خفيف وظريف، وكل حلقة بتحكي قصة جديدة. فعلاً أنجح عمل لجورج خباز على الإطلاق ومش مصدقين نرجع نشوفن سوا على الشاشة.

قدي هل خبر بفرح القلب خاصةً بعد ما غابت الدراما اللبنانية عن الساحة وصار في بس أعمال مشتركة. نحنا ناطرين مناطرة نرجع نشوف أعمال لبنانية بحت ونشوف الممثلين اللبنانيين لي اشتقنالن كتير وأكتر شي جورج خباز ويورغو شلهوب.

“عبدو وعبدو” هوي فرصة حقيقية لعودة الدراما اللبنانية القوية على الشاشة.

ما تطولوا علينا الغيبة!

شوفوا كمان، نانسي عجرم وعمرو دياب بفيلم سينمائي لأول مرة.