١٠ مطارح بيعملوا بوفيه بالطبيعة حول لبنان

ما في أحلى من بوفيه مع العيلة بالويك-اند! فكيف إذا كان بأحضان الطبيعة وبين الخضار؟ مشوا ندلكن ع ١٠ مطارح لتنبسطوا مع عيلكن ع بوفيه بالطبيعة.

1. بيت القمر، دير القمر

بيت ضيافة جبلي بقدملكن بوفيهات شهية ومطبخ مفتوح بالطبيعة. تلذذوا بالمازة اللبنانية والطبخات البيتوتية المعمولة بكل شطارة، واستمتعوا بقعدة جبلية استثنائية مع الهوا البرود والمناظر الحلوة.

الرقم: 411 661 03

2. مطعم Biomass، جربتا

مطعم بيوماس بيقدملكن الأكل طازة من المزرعة ع طاولتكن. بيستقبلكن ع بوفيه مفتوح بالويك-اند والأعياد. كمان يعتبر مقصد مميز لكل حدا عبالو يفرش حصيرة ويعمل نزهة بالطبيعة، وحتى عندن مساحات خضرة واسعة فيها ملاعب للولاد.

الرقم: 532 532 03

3. غلوريا، فتري

هالبيت القديم والمعصرة صار ناطركن كل ويك-اند مع بوفيه لتتلذذوا بالأكلات الطيبة، إضافةً للنبيذ والعرق المفتوح! البيت هو بيت عيلة هادي مع جنينة ساحرة بتطل ع وديات فتري، جبيل. هيك بتستمتعوا بلقمتكن مع منظر بيخطف الأنفاس.

الرقم: 005 135 71

4. ليتل ريد، القصيبة

ليتل ريد بحسسّكن إنكن رجعتوا ع بيت التيتا وبعيشكن جو الضيعة والريف. عندن بوفيه من أطباق محلّية معمول ع إيدان ستّات الضيعة، ونشاطات مهضومة للولاد بالمزرعة.

الرقم: 300 007 76

5. Nomad Nature And Nurture، سرجبال

أكتر من كونها مقصد للراحة والاسترخاء، نومادز نيتشور أند نيرتشور بتقدملكن كمان تجربة أكل مميزة. بيعملوا بوفيهات ع الويك-اند من أكل بلدي دغري من الأرض. عدا عن انو عندن وحدة من أجمل القعدات ع النهر والنشاطات الروحية بنص الغابة.

الرقم: 709 370 76

6. طاولة باكيش، بسكنتا

طاولة باكيش مقصدكن هالصيفية لتدوقوا لقمة بلدية بقلب بستان التفاح. استمتعوا بأجمل إطلالة ببسكنتا مع بوفيه مفتوح من أطياب المنطقة.

الرقم: 301 767 81

7. بيت الجبل، دير القمر

بيت الضيافة ومطعم بيحتفلوا بالتراث اللبناني بعمارتن التاريخية وأطيب الأكلات التراثية. بتقدروا تزوروهن كل أحد لتنبسطوا ببوفيه بالطبيعة مع إطلالة مهيبة ع دير القمر.

الرقم: 767 160 71

8. أرض، برمانا

قعدة من فوق الوادي بالهوا الطلق، مع بوفيهات مفتوحة للعيلة بنص الطبيعة عند أرض برمانا.

الرقم: 901 190 03 

9. بيوت غلبون، غلبون

عدا عن تقديم بيوت ضيافة بجبيل ومسبح مطل ع الوادي، بتلاقوا عند بيروت غلبون بوفيه بالطبيعة مميز ليوم ممتع مع العيلة كلها.

الرقم: 666 771 76

10. طاولة عميق، البقاع

طاولة عميق رح يدهشكن بمنظر خيالي لسهل البقاع مع لقمة بقاعية أصيلة، بوفيه مفتوح، وقعدة بنص الطبيعة.

الرقم: 481 004 03