بتعرفوا إنو في مغارة منسية بلبنان ما حدا سامع فيها؟

لبنان في بحر وجبل وسهول ووديان على مد عينكن والنظر، تاريخ وطبيعة، وأكيد مباني أثرية تاريخية ورواسب طبيعية وعجايب من ضمنها مغارة منسية كتير حلوة ولكن ما حدا بيعرفها!

^{Credits: A7la Balad Lebnen}

مغارة المبعاج مخباية بضيعة بقضاء جبيل، ببلدة علمات تحديداً، موجودة جنب دير القديسة تريز. هيدي المغارة كتير مميزة وبتسحر العين والقلب، بس للأسف الدولة مش عاطيتها حقها. هي بعيدة عن بيروت حوالي 55 كيلومتر، وبتستاهل زيارة بتعرفوا ليش؟ لأن عنجد فيها عجايب طبيعية قليل تلاقوها.

^{Credits: A7la Balad Lebnen}

الحكاية بتخبر إنو الفرنساوية هني اللي اكتشفوا مغارة المبعاج سنة 1938. طلعوا وصاروا يخبروا عن جمال المغارة وعن جمال البرك والبحيرات والمستنقعات جوا. اضطروا يستعملوا الزوارق مطاطية بوقتها ليقدروا يمشوا جواتها! وكمان بخبروا عن إنو شافوا تماثيل كتيرة متكونة من الرواسب المائية وعن الهوابط والنوازل اللي بكل الأشكال والأحجام. شو هالجمال!

^{Credits: A7la Balad Lebnen}

المغارة اللي بتقدروا تدخلوا عليها حوالي 220 متر بس، أما طولها الحقيقي يقدر بـ 4500 متر!

^{Credits: Star times}

بتعرفوا شو كمان؟ بالشتوية بتتحول مغارة المبعاج لنهر متدفق وبصب بميتو ببلدة الفيدار جنب جبيل.

^{Credits: A7la Balad Lebnen}

جوات المغارة في قاعات وممرات ودهاليز كتير كتير طويلة وعالية، بس للأسف ما بينوصلن بسهولة. فيهن درج لازم تطلعوا عليه حوالي 40 متر لتوصلوا. الهوا جوات المغارة كتير منعش ومفيد للجسم.

عنجد لبنان كل يوم منكتشف في شي جديد ومنصير معلقين بالبلد أكتر وأكتر رغم كل شي.