٨ بيوت ضيافة ما رح تصدقوا موجودين بلبنان!

بهالأجواء الصيفية، أحلى ضهرة بتكون بتضمن بالتأكيد الاسترخاء والاستمتاع بجمال الطبيعة. ونحنا لهيك جمعنالكن اليوم أحلى بيوت الضيافة اللي بتتميز بأجوائها الرايقة والمريحة ويلي ما بتلاقوها وين ما كان ولي ما تصدقوا حتى إنها موجودة بلبنان. ما حدا يضيع وقتو بخطط مملة، جربوا واحد من هالبيوت الضيافة وخلوا تجربتكن تكون مميزة ومليانة بالاسترخاء والسعادة.

١. Neoli، جبيل

بيت ضيافة بجبيل، بيشبه غرف الأوتيلات الساحرة، بتلاقوا في قعدة رومانسية ورايقة بتطغي عليها الألوان الرايقة والألوان الترابية، وعندن كل وسايل الراحة والخدمات المميزة يلي عم تنبشوا عليها، مكان مثالي لتعيشوا في لحظات السحر والفخامة.

الرقم: 878 880 81

٢. Ito’s Crib، تنورين

بيت حجر قاعد بين الشجر بتنورين، في منظر طبيعي بيخلي قلبكن يرتاح، بتقدروا تجوا تروقوا أعصابكن وتعيشوا بجو الطبيعة. الفيلا فيها مسبح طبيعي من الصخر والحجر بياخد العقل وبطل على وادي تنورين، بتقدروا تتفرجوا على المناظر الطبيعية من الجنينة أو من التراس الحلو والجنينة.

الرقم: 559 884 03

٣. Caim Mountain Retreat، ميروبا

مكان فخم بمرتفعات ميروبا، عندو منظر طبيعي ما بتلاقوا متلو. وبتقدروا تتحمموا بوج هالمنظر أو تقعدوا بقلب الجاكوزي وتستمتعوا بجو هادي وهوا نقي، ومكان معزول عن العالم. صراحة أوضة النوم ساحرة الجمال، الحيطان وراكن والقزاز مفتوح قدامكن على أجمل منظر بالطبيعة المنعزلة. المكان المثالي للهروب من صخب الحياة اليومية والاستمتاع بالهدوء والطبيعة الخلابة.

الرقم: 494 649 81

٤. Seven Oaks، عين التفاحة

بيت ضيافة عندو قعدة ساحرة محاطة بشجر وجو طبيعي من غير عالم. القعدة عندن مع منظر مفتوح على السما والنجوم، بتلاقوا أوض نوم ومطبخ زغتور في كل شي بتحتاجوا وحمام مع دوش معلق بقلب الشجرة لترتاحوا وتتتنفسوا هوا نقي.

الرقم: 191 934 70

٥. Rai Guesthouse، جبيل

بيت تروبيكال قاعد بجبيل، في جو غجري بس حلو. قعدة رايقة وحجر مع عناصر موديرن وشوية قش وزينة وقريب على البحر. عندن أوضة نوم كتير مهضومة وخرج كنكنة ورومانسية وقعدة الجنينة بتلاقوا فيها الراحة والهدوء والأجواء التروبيكال.

الرقم: 344 339 76

٦. بيت اللوز، كفرحباب

هالقعدة الساحرة مخباية عن العالم وقريبة من السما، هون بتقدروا تستمتعوا بجمال الطبيعة وتنسوا همومكن وانشغالاتكن. فيلا حجر عتيقة مع منظر برد الروح وحتى عندن بيسين مخبى برا بالهوا الطلق ومفتوح على أجمل منظر للنجوم والغيوم والوديان، بتنزلولوا من الغرفة دغري وبتغطسوا إجريكن بالمي، شعور بياخد العقل.

الرقم: 595 002 03

٧. كاسادار، عنايا

بيت ضيافة جبلي مريح، في هوا نقي وجو طبيعي، مكان مميز لتسترخو وتنسوا الدني كلا. بتلاقوا بقلبو حمام روماني من حجر محاوط بالشموع والأضوية الخفيفة مع منظر من الخيال وكمان تخت مرجوحة تحتو بيسين مع منظر مكشوف على الوديان والجبال.

الرقم: 059 019 03

٨. سكابا، عجلتون

محل معزول عن العالم وعن الدني كلا،  في بيسين روعة بقلب الغابة بطل على منظر ساحر ولا أجمل من هيك وجاكوزي ومطعم وسبا مميز لكل مين عبالوا يغنج حالو ويلي بحبو. بتحسوا حالكن سافرتوا على شي جبل بالمكسيك وعم تعيشوا أجمل إيام حياتكن.

الرقم: 070 106 70