شو قصة القصر الأسود بلبنان؟ شوفوا معنا

من أكتر من أربعين سنة، الدكتور إيلي صراف، يللي هو طبيب أسنان ومؤسس نقابة أطباء الأسنان بالشمال، كان عندو غصة كبيرة بقلبو. حلم كان يراودو يللي هوي إنو يبني معلم يخلد ذكر بلدتو كسابا ويصير مزار لكل اللي بيحبو لبنان. ما منع الدكتور إيلي شي، لا الحرب ولا صوت الانفجارات ولا صوت الرصاص، وما حدا قدر يشيل هالحلم من راسو.

رجع علبنان من بعد ما كان عايش برا ليحقق حلمو بوقت الدمار والتهجير، ووسط كل هالوجع، بلش يبني حلم الكبير يلي هوي حلم حياتو “شاتو دو ليبان” يلي نعرف بعدين “بقلعة لبنان”، ويلي رجع انعرف كمان ب”القصر الأسود” بسبب لون الحجر البركاني الأسود يلي في.

بتعرفوا شو القصة ورا هالحجر الأسود؟

هيدي حجارة بتحكي عن قصة بركان خامد عمرو أكتر من 4300 سنة كان موجود بين ضيعة القبيات وعندقت ومنجز. الدكتور إيلي وبالعرق والوجع، نقل هالحجار بطريقة قديمة مع عمال محليين من عكار لكسابا. هيك صار الحلم حجر، وهيك صار البركان خامد مصدر للفخر والعز.

^{Credits: لبنان الجمال – the beauty of lebanon – La Beauté du Liban}

القصر على شكل برج عالي متل القلعات اللي كنا نشوفها بالقصص القديمة، وكل حجر في بيحكي حكاية. من فوق، في قبة كبيرة بتتوج هالعمارة العظيمة متل تاج ع راس الملك. وشو هالمنظر الخرافي اللي بطل عليه القصر؟ وادي قاديشا بكل عمقو واخضرارو، جنب دير حماطورة الفائق الجمال، يا رب يخلي هالطبيعة اللي بتخلي القلب يدق!

بس القصر الأسود منو بس عمارة حلوة بتطل عالوادي. هيدا قصة صمود عيلة من كسابا ضد كل الظروف. هيدا قصة عزيمة وإبداع لبناني رفض يستسلم وحب لبنان لدرجة قرر يحطوا للبنان بطولو وعرضو وتاريخو وحاضرو بقلب قصر. هيدا قصة حلم بقلب قصر صار مزار لكل اللي بحبوا لبنان كتير لدرجة حابين يشوفوا المتحف بقلبو يلي بيعرض تاريخ لبنان من زمان لهلق وكل مرحلة من مراحلو.

أكيد بيستاهل زيارتكن لأن بيشبه القصور الملكية.

^{Credits: Ella travel}