سامعين عن متحف عساف؟ جنة زغيرة مليانة تحف وورود

تخايلوا حالكن بعالم تاني، تركتو ضجة بيروت ورا ضهركن ووصلتوا على محل كتير حلو ومريح للنفسية يلي هوي وادي الورحانية بقضاء الشوف.

الطبيعة ما فيكن تتخايلوا قدي حلوة، والهوا نقي، وصمت المنطقة بياخدكن على محل كتير رح يعجبكن، بيت حجر محاط بالشجر والورد، وبهالمنطقة الساحرة تحديدًا في متحف كتير حلو، متحف عساف، يللي هو أكتر من مجرد متحف للفن.

هالمتحف قصتو قصة، قصة عيلة عساف، تلات إخوي نحّاتين ورتوا هالحرفة عن وبين وأخدوا قرار يخلدوا تراث العيلة بهالطريقة. على مساحة ١٠,٠٠٠ متر مربع من الأرض البكر، بنوا عالم فني وطبيعي متكامل بياخد العقل.

هيدا المتحف منو متحف بس هوي بيت بترتاحوا في من كل شي وبتعيشوا تجربة بحد ذاتها وبتزوروا ضيعة لأول مرة بتزوروها وبتعملوا مشوار غير عن المطاعم والبحور والمحلات يلي معودين تزوروها.

شو رح تشوفوا إذا زرتوا مشغل عساف؟ أول شي رح تتعرفوا على فن النحت من خلال حديقة منحوتات بتجنن، كل منحوتة إلها قصة بتحكي عن علاقة الإنسان مع الطبيعة. بعدين، رح يستضيفوكن بقلب بيت ريفي صديق للبيئة بيعتبروا كتير من الناس نموذج للبناء المستدام يللي لازم نتعلم منو.

وكمان هوي جنة زغيرة مليانة ورود وشجر من المنطقة وعندن جنينة فيكن تقعدوا فيها على المقاعد المهضومة وتتسايروا وتشوفوا مغيب الشمس وتاخدوا أجمل الصور، تجربة بتستاهل تعيشوها ولو لمرة وحدة بس لأن رح تخليكن تحسوا حالكن بشي فيلم من الخيال.

بس مشغل عساف مش بس متحف بيعرض أشيا، هيدا المحل بيتنفس فن وطبيعة. من خلال إعادة إدخال نباتات وأشجار المنطقة المفقودة، قدروا يرجعوا التوازن اللي لازم يكون بين الإنسان والبيئة. هالتجربة الفريدة عم يديرها عساف ومنصور وعارف عساف، الاخوي التلاتة اللي حافظين إرث عيلتن ويلي فن النحت عم يجري ب عروقن.

المشغل فتح بوابو من كم يوم للعموم، وصار بالفعل وجهة سياحية ثقافية مميزة للبنانيين ولكل مين زهق من مشاوير بيروت ومشاوير الساحل. روحوا نبسطوا، تأملوا بالفن والطبيعة، وستعيدوا شوي من الاتصال الحقيقي مع الأرض.

متحف عساف أكتر من مجرد متحف، هوي بيت جبل لبناني أصيل منحلم نعيش في وقصة عيلة وقصة عشق للبنان بكل تفاصيلو.

شوفوا كمان، محتار وين تروحوا بالصيفية مع العيلة؟ زوروا هالمنتجع بالدامور.