بتتذكروا ممثلين غنوجة بيا: وين صاروا اليوم؟

غنوجة بيا مسلسل كوميدي انعرض على الشاشة سنة 2006 وفات على قلب كل بيت لبناني لدرجة نعمل منو فيلم سينما كسر الأرقام القياسية بالصلات وحقق إيرادات كبيرة.

هالمسلسل تأليف الكاتبة اللبنانية منى طايع وبطولة ريتا برصونا وبيتر سمعان ونادين الراسي وغسان سالم، توقف عرضو بوقتها لفترة بسبب حرب تموز ولكن رجع استكمل عرضو من بعدها.

قصة المسلسل بتدور حول بنت رجل أعمال غني إسمها رنا بركات لاقت حالها فجأة فقيرة من بعد ما فلس بيها فلاقت حالها مجبورة تواجه الحياة من دون مصريات ودعم بيها وهيك بتبلش تدور أحداث المسلسل بإطار كوميدي لايت. شو رأيكن نرجع نتذكر أهم شخصيات هالمسلسل ونشوف وين صاروا اليوم؟

١.ريتا برصونا

أشهر مسلسل إلها “غنوجة بيا” يلي لعبت في دور رنا بركات البنت الغنوجة الأمورة ومن ورا حازت على جايزة الموريكس دور سنة 2006 كأفضل ممثلة عن دورها بالمسلسل وكمان نالت لقب الموركس دور كأفضل ثنائي جماهيري إلى جانب بيتر سمعان سنة 2006 عن دورها بنفس المسلسل، من مسلسلاتها منذكر “الليلة الأخيرة” و”مجنون ليلى” ويلي ترشحت من بعدن على جايزة الموركس عن دورها البطولي بهالعملين. تجوزت من دبلوماسي أميركي وانتقلت معو على أميركا وإجاها ولدين “أوين” و”أوليفر” ومن ملسلستها الشهيرة منذكر “جميل وجميلة” وفيلم “ليلة عيد” وآخر أعمالها التلفزيونية كان مسلسل” أصحاب 3″ يلي انعرض على شاشة MTV و”دورة جونية جبيل” لي انعرض على الLBC.

٢. بيتر سمعان

لعب دور البطولة والكل عشق دورو بوقتها وكان الشيخ الشباب “طارق فياض”، هوي ممثل لبناني حاز على شهادة بتصميم الموضة من أكاديمية مايكل أنجلو وشهادة بالمسرح من الجامعة اللبنانية. شارك بالعديد من المسلسلات والبرامج لكن دورو بغنوجة بيا حقق نجاح كبير. ومن أبرز أعمالو “باب إدريس”، “ولاد البلد”، “عصر الحريم”، “ليلة عيد”،”أمير الليل”، “رهن التحقيق”، وآخر مسلسل إلو “سر وقدر” كتابة فيفيان أنطونيوس وشاركتو بالبطولة رهف عبدالله هالمسلسل مفروض ينعرض قريباً على شاشة للLBC. هالمرة نقى يكون إسمو كمان “طارق” بعد ما عرفوا الجمهور بإسم طارق فياض.

٣. غسان سالم

مين ما بيتذكر شادي يلي كان بيحلم يسافر من لبنان ويلاقي شغل برا، كان مفروغ ببنت إسمها رويدا بس بيرجع بيتجوز نادين يلي مغرومة في بس بدون أمل ليحصل على الجنسية منا ويسافر وبالآخر بينغرم فيها. شارك بالعديد من المسلسلات اللبنانية متل “أجيال” و”هنادي” وهوي مش بس ممثل هوي فنان شامل، اشتغل بمجال تقديم البرامج والدوبلاج ويعتبر صوتو من أهم الأصوات بعالم ال voice over بلبنان لأنو حاطت صوتو على ميات الدعايات والبرامج التلفزيونية والإذاعية وأهمن “ستار أكاديمي”. ومؤخراً قدم الفنان غسان سالم إحتفال ضخم على مسرح كازينو لبنان أطلق في ألبومو “الياس الرحباني يقدم غسان سالم 3”.

٤. نادين الراسي

لعبت دور نادين حبيبة شادي وصديقة رنا المفضلة وبرعت في وأكتر شي كانت تضحكنا وقت تحكي عن أمتال ستا، شاركت نادين بالعديد من المسلسلات متل “ولاد البلد” و”جريمة شغف” وحصلت على جايزة الMurex D’or تلات مرات، بسنة 2007 عن دورها “غنوجة بيا” وبسنة 2008 عن دورها بمسلسل “إبني”، وبسنة 2010 عن كل أعمالها بسنة 2009. تجوزت مرتين، مرة من حاتم حدشيتي ومرة من جيسكار أبي نادر، وهي أخت الفنان الراحل جورج الراسي. آخر أعمالها كان مسلسل “عرابة بيروت” يلي عرض قبل كم شهر على منصة “شاهد”. وهي اليوم عم تحضر لعمل جديد مع باسم ياخور وكارلوس عزار “قلب أسود”.

٥. أنطوان بلابان

لعب دور “فريد بركات” بيا لرنا الغنوجة وصاحب المعمل وصديق طارق فياض، كان حلمو يشوف بنتو عم تتجوز طارق فياض. شارك بالعديد من الأعمال والمسلسلات منها “صور ضائعة”، “طالبين القرب”، “غنوجة بيا”، وآخر أعمالو “الهيبة جبل” يلي لعب في دور أبو فارس.

٦. رانيا عيسى

لعبة دور “دولي” خطيبة طارق وحبيبة قلب إمو، وهيي خريجة كلية الإعلام وحصلت على ماجستير بالراديو والتلفزيون، دخلت عالم الفن بالتسعينات ولكن انطلاقتها الفعلية كانت سنة 2006 بمسلسل “غنوجة بيا”، تجوزت شخص يدعى جورج وعندها ولد منو إسمو أندرو وبنت إسمها أيفي. من أهم أعمالها” زوجتي أنا”، “وين كنتي”، “أحمد وكريستينا”، “حلوة وكذابة”، “لونا”، “عصر الحريم”، “أولاد آدم”، ومؤخراً “للموت 3″ و”لحن البحر”.

٧. ميرنا مكرزل

بتتذكروا فيكي يلي بتحكي مكسر ويلي مغرومة ب”فريدو”؟درست التمثيل بجامعة القديس يوسف وشاركت بالعديد من الأعمال متل مسلسل “هيك تجورنا”، فيلم “بالغلط”، فيلم “ع مفرق طريق” ومسلسل “نساء في العاصفة”. وبتقول بتفضل تأدية الأدوار الكوميدية وحالياً بصدد تقديم عمل مسرحي قريباً.

٨. غدي

لعب دور مميز بالمسلسل حيث حل كضيف مفاجئ الكل حب دورو واستهضموا، هوي فنان لبناني تعلم بمعهد الموسيقى اللبناني. بلش مشوارو الغنائي بالمطاعم حتى افتتح مطعمو الخاص، أول أغاني كانت “دخليك عود” سنة 2004 ورجع عمل غنيتو الشهيرة “بكي دم” و”باشق مجروح” يلي حققت نجاح خيالي. ظهر بعدة مسلسلات لبنانية متل “رصيف الغربا”، و”متر ندى”، ومؤخراً تجوز إخت ليال الاختيار، ملاك بإسطنبول وعندن ولد إسمو “رفايل”.

٩. سعد حمدان

مين ما بيتذكر عدنان يلي صار حالة خاصة بحد ذاتو وهوي الشخصية يلي كانت تضحك الكل، هوي ممثل ومغني ومؤدي صوت ومن أبرز أعمالو “بلاد العز”، “أدهم بيك”،” موت أميرة” و”من الآخر” ولكن أشهر مسلسل إلو كان “غنوجة بيا”. تجوز من السيدة لولو خداج يلي أزغر منو بسنوات ومن أعمالو المميزة المشاركة بعمل درامي مصري مع عادل إمام وإسم المسلسل “فرقة ناجي عطالله”. آخر مسلسلاتو على الساحة اللبنانية كان “أميرة الروم”.

شوفوا كمان، بتتذكروا ممثلين فاميليا: وين صاروا اليوم؟