بتعرفوا إنو فخر الدين عندو مغارة مخباية بالجبل؟ معلم تراثي منسي

بتعرفوا إنو جبل لبنان عندو قصص مخباية، بس هالمرة رح نحكيكن عن قصة كتير مهضومة عن مغارة فخر الدين المعني اللي ما منعرف إنها موجودة، مغارة تاريخية كتير مهمة موجودة تحت شلال جزين اللي هي فعلياً تحفة طبيعية.

شو قصة هالمغارة وليش تسمت مغارة فخر الدين؟

فخر الدين المعني اللي ما حدا في ينسى بطولاتو وشطارتو، عندو قصة بهالمغارة لهيك تسمت عإسمو. من بعد ما وصل إنو صار عندو نفوذ كبيرة وضم أراضي من سوريا وعمل علاقات مميزة مع أوروبا، بلشت السلطات العثمانية تلاحقوا لتقتلوا لأن صار بشكل خطر على نفوذ العثمانية بالمنطقة وخاصةً لأن كان محبوب كتير من الناس ومن العالم، لهيك هرب وتخبّي بهالمغارة من الاتراك. بهاي الفترة كان هوي سيّد على لبنان وحط كل الإمارات الساحلية تحت حكمو وكانت كل الناس تحبوا، بس السلطنة العثمانية ما عجبها هالشي، فصاروا ينبشوا عليه لحد ما انجبر واضطر يلاقي مأوى بهالمغارة.

بقولوا كمان إنو هالمغارة كانت لفترة مخبى لسكان جزين والضيع المجاورة بفترة الحرب العالمية الأولى والحرب العالمية التانية. معروف إنو شعبنا لقدر يعيش ويكفي بوج كل الظلم والإضطهاد يلي كان يتعرضلوا، كان يتخبى بالمغاور.

^{Credits: Jezzine Extreme Adventures}

المغارة عبارة عن نفق ما بيقدّر الواحد يمشي في إلا زحف. بس من جوا المنظر بتخطف القلب! فيها صخور متشكلة بطريقة عجيبة وكمان في روايات عن ممرات طويلة بتوصل هالمغارة بجبل نيحا، بس ما حدا قدر يوصل لإلها بعد لأنو ما في أوكسجين كافي جوا.

للأسف، هالمغارة مهملة كتير! وفي شبه كبير بين هالمغارة وبين مغارة جعيتا، هالقد هالمغارة حلوة بس بنفس الوقت كلها عجايب وغرايب مخباية.

^{Credits: Lebanon is paradise}

هلق في خبرية حلوة عن هالموضوع بس ما عدنا عرفنا شو المستجدات، من كم سنة ربحت بلدية جزين بمشروعين مميزين تقدموا فيهن للوكالة الأميركية للتنمية الدولية USAID. المشروع الأول بيعنى هالمغارة التاريخية ومفروض كان يشتغلوا ع تأهيل المدخل تبعها، وكمان كان مفروض ينعمل مسار للمشي جوا، وتركيب إنارة، وحتى لوحات إرشادية بتخبر قصة المغارة.

^{Credits: Jezzine}

مفكرين شلالات جزين والمطاعم الحلوة حواليهن هني المعلم السياحي الوحيد بالضيعة؟ صرتوا تعرفوا عن هالمغارة كمان، لأن هيي مش بس مغارة، هيي قطعة من تاريخنا وتراثنا اللبناني. وعنجد قدي شي جديد وغريب نقدر شي نهار نمشي بهيك مغارة ونكتشف شو مخبايي.