شي غريب: بتعرفوا إنو في شجرة بتطلع مي بلبنان؟

من القصص الغريبة اليوم: شجرة بتطلع مي!

بعمركن شايفين شي شجرة بتطلع مي؟ عنجد عم نحكي في هيك شي بلبنان! أكيد شايفين شجرة بتطلع زهر وشجرة بتطلع تفاح وليمون وزيتون، بس مي أكيد لاء.

وين موجودة هالشجرة؟ بمنطقة فاريا بجرود كسروان. يعني خرج تزوروها عطريقكن إذا عبالكن تعملوا سياحة داخلية بالمنطقة، أو طريقكن على شي مطعم بالمنطقة.

كيف بتنزل المي؟ بتنزل المي من الشجرة عن طريق حنفية العين، متل تبع الضيعة. بتفتحوا الحنفية وبتزل منا مي مجلدة وطيبة كتير. وهيك بتعبوا القنينة من مية العين، أو بتشربوا من الجرن، وحتى فيكن تعبوا المي بإيديكن.

أكيد المي موصولة بشي عين قريبة، ولهيك بتدفق المي بشكل متواصل من خلال الشجرة. عنجد شي كتير غريب بس مهضوم. إنتو كمان تحمستوا تصوروا هالشجرة وتشربوا مي منّا؟

صراحة نحنا كتير تحمسنا، وعنجد عبالنا نضل نعيش ونشوف هيك خبار ونجرب قصص جديدة بالبلد.

تفرجوا على هالشجرة المهضومة اللي بتطلع مي بالفيديو مع جيلبير اللي اكتشفها هوي وعم بنظم أحد رحلاتو السياحية بلبنان:

شوفوا كمان، بتتذكروا ممثلين فاميليا: وين صاروا اليوم؟