مطعم رومانسي من إيام الزمن الجميل: جوهرة مخفية بجونية

زهقتوا من نفس المحلات وعبالكن تروحوا مع حبيبكن على محل بعد ما حدا راح علي من قبل؟ اليوم رح نعرفكن على كنز مخفي بحياتكن أكيد مش سامعين في، من فترة زرنا ونغرمنا بكل شي في.

هالمحل مخبى بدكن تستدلوا عليه لتوصلوا، بس لما بتفوتوا علي رح تشوفوا الشموع المضواية ناطرتكن لتقضوا أحلى أوقات حياتكن والموسيقى الرومانسية عم تريح أعصابكن.

المحل يلي عم نحكي عنو إسمو l’absente وعنجد إسم ع مسمى لأن هيك محل بهل جمال والروقان والرومانسية بحسسنا إنا غايبين عن عالمنا وسرحانين بعالم تاني.

بتنقوا بين القعدة جوا أو برا، القعدة برا بالجنينة على العشب بين الشجر والورد، بتقعدوا على كراسي الخشب والطاولات الخشب وبتبوردوا شوي، الأضوية خافتة ورومانسية وبعيدة عن كل العالم.

القعدة جوا رح ترجعكن لإيام اللولو، وقت كان كل شي ماشي على الهدا بلبنان.

هلق المحل من جوا، شموع مضواية وبيانو وراديو عتيق وقعدة حجر رومانسية. وبالشتوية بياخدكن على عالم رومانسي من الأكل الدافي وعشا على ضو الشموع ودفى النار.

الحلو بهل مطعم إنو أصحاب المحل هني بحضروا كل الأكل على إيدن وبقدمولكن يا، ما في مينو معين بس كل أسبوع بيعملوا شي جديد. بتقعدوا على الطاولة، وبقدمولكن كذا طبق ورا بعض وأكيد في طبق أساسي والكمية كتير كريمة وبيتوتية بتستحلوها. وبالآخر بضيفوكن أطيب طبق حلو من دياتن، ولا أطيب من هيك.

هلق منوصل لبيت الأصيل، النبيد… الأحلى من الأكل هوي النبيد، ريحتو بتشق القلب وهني بحضروا كمان. كل شي محضر من حواضر البيت على طاولتكن، حتى الجبنة بحضروها على إيدن والخضرا من البستان.

بتتعرفوا على أصحاب المطعم وبتاخدوا أجمل صور وبتعيشوا لحظات رومانسية بهالمحل.

العنوان: عين الريحانة، جونية
بيفتح: خميس، جمعة، سبت
الرقم: 090 427 03

شوفوا كمان، فرن شامات: جوهرة مخفية بقلب ضيعة ما حدا سامع فيها.