١٠ مطاعم على النهر خرج ضهرة مع العيلة بلبنان!

عبالكن تغيروا جو هالأحد وتروحوا كزدورة مع الولاد لشي محل غير شكل وتستمتعوا بالغدا الطيب على صوت المي جنب النهر؟ لتقضوا أحلى نهار أحد سوا بقلب الطبيعة، رح نعرفكن اليوم على ١٠ مطاعم مميزة على النهر خرج ضهرة مع العيلة بلبنان.

١. الطواحين، بساتين العصي

كل عيلة بتنطر نهار الأحد لتروح تكزدر مع الولاد بمحل حلو وبرود وهالمحل هوي المحل المثالي. القعدة بتجنن على النهر والأكل لبناني أصيل، بيتفرجوا الولاد على البط وبطعموهن وفي كمان ألعاب للولاد.

الرقم: 611 926 03

٢. شلالات بارادايز، بعقلين

القعدة هون بتاخد العقل، عصوت المي وريحة الشجر وصوت العصافير، بتمدوا سفرة لبنانية من كل شي بيخطر عبالكن مع منظر خيالي على شلالات بعقلين وبتمارسوا مختلف النشاطات المائية.

الرقم: 669 924 03

٣. مطعم جنة النهرين، رشميا

مطعم قاعد على النهر دغري، بتحملوا حالكن وبتعملوا كزدورة على الشوف وبتقعدوا بالطبيعة الحلوة وبتاكلوا أطيب لقمة وبتخلوا الولاد يسرحوا ويمرحوا بالمساحة الواسعة.

الرقم: 141 844 70

٤. عهواك، عاليه

قاعد فوق النهر وخرج ضهرة مميزة مع العيلة، بتلاقوا البط كمان عم يسبحوا بالميات، الولاد رح يحبوا القعدة كتير برا خاصةً لأن في حديقة حيوانات قريبة. بتاكلوا لقمة طيبة وبتقضوا نهار بالبرودات سوا.

الرقم: 970 650 81

٥. جسر القناطر، العقيبة

عبارة عن مطعم موجود على الجسر وقريب كمان من البحر، بحضرولكن أطيب أكلة سمة وأطيب لقمة بيت من تحت ديات أصحاب المحل والولاد رح يكيفوا لأن في ألعاب كتير.

الرقم: 011 460 70

٦. جسر رشعين، زغرتا

هالمحل على النهر دغري وبجبلكن أطيب المأكولات اللبنانية الشهية وأطيب شي عندن الكبة المشوية المعمولة على الطريقة الزغرتاوية. بتجوا مع العيلة وبتغيروا جو نهار الأحد وبترجعوا بتعملوا كزدورة بالمنطقة.

الرقم: 233 338 03

٧. مطعم الفوار، أنطلياس

شلالات ومي وخضار ولقمة طيبة ولذيذة حد النهر، بتعملوا كزدورة مع الولاد بمحل حلو وبرود وبتقضوا نهار الأحد بمحل قريب من بيروت ومميز بنفس الوقت.

الرقم: 500 415 04

٨. جسر النهر، بسكنتا

القعدة هون بترد الروح وبتخليكن ترتاحوا من هم الجمعة كلو، خدوا الولاد كزدورة على بسكنتا وشموا الهوا وخدوا أجمل صور سوا.

الرقم: 101 987 03

٩. كازينو نمير، زحلة

قاعد على البردوني بزحلة، أحلى كزدورة مع العيلة على نهر البردوني نهار الأحد. الأكل لقمة بيت وصحي وكل شي محضر من ديات أهل البيت، بتاكلوا وبتتمشوا على البردوني وبترجعوا بتتحلوا بالبوظة.

الرقم: 666 894 03

١٠. نبع عنجر، عنجر

مطعم فوق النهر، بتطلعوا بالمي بتلاقوا سمك وبط عم يسبحوا، أما القعدة على التراس بترد الروح، عندن سفرة لبنانية وأرمنية على مد عينكن والنظر وأطيب شي عندن البطاطا المنفوخة. ولادكن رح يكيفوا بهل مشوار نهار الأحد.

الرقم: 590 000 71

شوفوا كمان، ٦ مطاعم إيطالية قاعدة بالضيعة بلبنان!