١١ مطارح خرافية لتشوفوا مغيب الشمس بالجبل!

اليوم رح ناخدكن على الجبل لنشوف سوا مغيب الشمس من ورا الجبال والوديان وكيف الشمس بتغرق خلف المدى.

١. Lavender Getaway، كفرقطرا

هون القعدة بالطبيعة بتشرح القلب، على المراجيح وبين الكراسي الملونين بتلاقوا حالكن نسيتوا هموم الدني، بتاكلوا لقمة طيبة وبتشربوا شي على ذوقكن وبتشوفوا مغيب الشمس من بعيد.

الرقم: 066 927 81

٢. سمارولا، الأرز

عبارة عن قعدة على الشير، بتطل على وادي قنوبين وبتشوفوا من هالنقطة أجمل منظر لمغيب الشمس. بتطلبوا شي طيب وبتتفرجوا على الشمس عم تختفي ورا الوادي، كأنكن قاعدين بين الغيوم.

الرقم: 933 923 81

٣. تشيري لاين، حمانا

الشعور يلي رح تحسوا بس تفوتوا على هالمحل الساحر ما بينوصف، قعدة حجر على وادي لا مارتين بتشرح القلب. بتقعدوا على رواق بدردشوا مع حبيبكن وبتاكلوا أطيب لقمة طليانية وبتتفرجوا على مغيب الشمس ورا الوادي.

الرقم: 588 335 71

٤. باب الهوا، إهدن

عبارة عن مطعم مخبى بالجبل وعندو مناظر خيالية على الجبل رح تخليكن تنسوا همومكن شوي زغيرة. عندو بتمدوا سفرة لبنانية على مد عينكن، منظر مغيب الشمس رح ياخدكن لغير عالم، بتحسوا حالكن قاعدين فوق الغيوم.

الرقم: 047 456 03

٥. سما أرزة، فتقا

مطعم لبناني متخصص بالمأكولات اللبنانية البسيطة متل المازة الشهية وطبعاً ما بدنا ننسى المشاوي والساندويشات يلي بحبها قلبكن والتحلايات على أنواعها. مغيب الشمس من هون بيشرح القلب، بتشوفوا البحر تحتكن وبتتأملوا الشمس عم تدوب بالمي.

الرقم: 228 556 03

٦. J Carlos، اللقلوق

من هون بلش الكون، من جبال لبنان الحلوة يلي بتاخدكن على السما والغيم من أول مشوار، هالمحل عندو قعدة تراس مع منظر على الجبال على مد عينكن والنظر ومن هون منظر مغيب الشمس عندن رح يريحلكن نظركن وقلبكن.

الرقم: 088 400 71

٧. Frozen Cherry، الزعرور

هالنقطة متل الحلم، بتحسوا حالكن بالسما بين الغيوم مع الموسيقى والمشروب والهوا يلي عم بروح وبيجي. قعدة بالهوا الطلق بالجبل، مخباية أجمل لوحة فنية لغياب الشمس.

الرقم: 225 661 71

٨. فوق الريح، فاريا

عنجد إسم على مسمى، هالمطعم قاعد فوق الريح وفوق الجبل والحجر، القعدة على التراس بتفتح النفس على اللقمة الطيبة والبيتوتية. وقت غياب الشمس، ونسوا عيونكن وتأملوا بالهوا وصوت الطبيعة وشعروا بخطوط الشمس الدافية على جسمكن.

الرقم: 807 817 81

٩. تلة، الكورة

من أجمل الأماكن يلي ممكن تزوروها بالشمال، رح يسرلقلكن قلبكن من أول زيارة. سندويشات وحلويات وأطباق سريعة وخفيفة ومشروبات ناطرتكن عندن، وعدا عن الأكل الطيب والقعدة الخيالية، المنظر وقت مغيب الشمس عنجد من أجمل ما يكون.

الرقم: 674 757 76

١٠. Valhalla، كفرعقاب

شو بدنا نحكي عن هالمحل لنحكي، من أجمل المواقع بالجبل لتشوفوا منو الشمس عم تختفي وتزغر ورا الجبل. نسوا كل هموم الدني واستمتعوا بالبرودات الحلوين وخيوط الشمس الدهبية.

الرقم: 138 331 81

١١. أرض، برمانا

شعور غريب بتحسوا لما تجو على هالمحل، بين الشجر والورد قاعد هالمحل، بتلاقوا كل أنواع الأكل البيتوتي اللذيذ والمحضر بلمسة مبتكرة وحنونة. منظر المغيب من هالنقطة رح يخليكن تحسوا إنكن قاعدين بشي ضيعة بإيطاليا بعيدة عن العالم، لوحة فنية مرسومة رسم.

الرقم: 901 190 03

شوفوا كمان، ٦ بيوت ضيافة وأوتيلات بتاخد العقل بالبترون.