قصة أشهر غنية لملحم بركات: ألّفها ولحّنها بس بخمس دقايق!

أشهر غنية للعملاق ملحم بركات وأقرب غنية على قلوب اللبنانية و اللي كلنا حافظينها كلمة كلمة أخدت معو بس خمس دقايق ليألفها.

أول شي عرفتوا عن أي غنية عم نحكي؟عم نحكي عن الغنية الشهيرة “ما في ورد بيطلب مي”.

شو قصتها هالغنية يا ترى؟

كان ملحم بركات (أبو مجد) رايح هوي والشاعر نزار فرنسيس على ضيعة كفريا للزيارة، فهني ورايحين بيقطعوا ببر الياس. وقال هونيك في بيت قديم عجبوا لأبو مجد وقال كان أنجق مبيّن من الورد الزغير! ما كان مبين منو غير شبابيكو وبوابو لي مغطا البيت كلو.

فبيقوم بقلوا نزار: “ليك ليك يا الله هالبيت شو حلو”.

قام بنكّت أبو مجد على الموضوع: “هيدا صاحبو بخيل، ما بدو يلبسوا حجر قام زرع ورد بعربش على الحيط، عم بوفر دهان”.

برد علي نزار وبقلوا: “بالعكس هيك أصعب، هلق تني إيدو مجبورة تضل بالوردات وبدو يصير يسقيهن ليل نهار لما ينتزعوا. لو عمل حجر أحسنلو“.

وما في خمس دقايق بيرد نزار على طريقتو الخاصة:

“ما في ورد بيطلب مي، الورد بيبقى سكوت… إذا ما سقيتوا شوي شوي على السكت بموت“.

وهيك رجع طلع اللحن مع أبو مجد هوي وعم بسوق ماسك الدركسيون، يعني على كعبها للقصة وبخمس دقايق بس طلعوا هالتحفة الفنية. وصلوا عند الجماعة بكفريا كان اللحن والكلمات خالصين مخلصين وهيك طلعلنا أجمل وأحلى غنية لملحم بركات. تركلنا شي نسرد عليه وقت قعدات الغدا نهار الأحد مع العيلة والأحباب مع كاس عرق ولحمة نية ووقت المناسبات السعيدة.

مين ما اشتاق لأبو مجد؟ مين ما اشتاق لخفة دمو وعفويتو وهضامتو وأدائو على المسرح؟ هالإنسان فعلاً ما بيتكرر يا ريت لو بقي معنا شوي زيادة على الأكيد كان قدر يخفف هموم عن إيامنا بلبنان بصوتو الدافي وبألحانو العفوية والقريبة.

“وغرامك بعدك بتخبي وتاركني عم دوق الغربة
عم بموت قلبي يا قلبي ت تبقى مبسوط… “

اشتقنالك يا أبو مجد! سمعوا أبو مجد عم بخبر الخبرية بنفسو:

شوفوا كمان، قصة أقدم زيتونة بالعالم موجودة بلبنان: زيتونة نوح.