بتعرفوا إنو فيكن تاكلوا توم بلا ريحة عند هالمحل؟

“كول توم بتصير مهضوم” هيدا شعار المحل هون.

حزروا ملا خبرية؟ في محل بلبنان بيعمل دجاج على الفحم مع توم بدون ريحة! صح متل ما عم تسمعوا هيدا المحل موجود ليفش خلق كل أكيلة التوم. صار فيكن تاكلوا توم قد ما بدكن من دون ما تعتلوا هم ريحة تمكن لأن ما رح تطلع أبداً.

التوم عندن تلات أنواع توم، أول نوع هوي التوم بلا ريحة يلي فيكن تاكلوا منو قد ما بدكن، تاني نوع هوي التوم الحر يلي بيرضي غرور عشاق الحر، وتالت نوع هوي توم لالا يلي بيجي قوي بس طيب كتير، لهيك بضيفوكن من بعدو بون بون على نعنع.

بلش لالا تشيكن سنة 1967 يعمل دجاج مشوي على الفحم وهوي من أول محلات الدجاج يلي فتحت بلبنان. عمو أندريه هوي المؤسس ويلي شتغل على جودة الفروج وصار من أهم محلات الدجاج بالبلد.

بيقدم الفروج المشوي مع بطاطا مقرمشة وتوم وشوية حمص وصوص وكبيس لتكمل معكن على الآخر، شي بيشهي!

فيكن تاكلوا عندن كمان كل أنواع المشاوي على الفحم مع أفخم التتبيلات لمحبي المشاوي والسندويشات. السندويش خفيفة نضيفة فيها دجاج مشوي على الفحم، الدجاج محمر منيح على المنقل وبينزدلها توم ولا أطيب وحبات كبيس روعة.

فيكن كمان تطلبوا حلو من قصص بيتوتية متل البسكويت ع شوكولا وعندن طربوش وعندن كمان معرض زغير لصور قدمية عن لبنان من إيام الزمن الجميل تتأملوا فيهن إنتو وعم تاكلوا.

الفرع الأول: الأشرفية
الرقم: 162 100 76

الفرع التاني: الكاسليك
الرقم: 966 949 78

شوفوا كمان، كبيس اللوز: اختراع لبناني بشق القلب.