٦ مطاعم إيطالية قاعدة بالضيعة بلبنان!

مين ما بيستلحي مشوار على الضيعة بهيك طقس مع أطيب بيتزا على الحطب وكاس نبيد مع منظر بطير العقل وشوية برود؟ مشوا معنا ب جولة على مطاعم إيطالية قاعدة بقلب الضيعة بلبنان.

١. بياتزا Piazza1140، حمانا

هالمحل قاعد على ساحة الميدان بتلاقوا عندو أكل إيطالي وقعدة كتير مهضومة. كل شي طيب عندن خاصةً البيتزا والباستا. القعدة بالضيعة يعني بين البرودات والبيوت التراثية والطبيعة الحلوة وبين الناس لي رايحة جايي.

الرقم: 178 138 79

٢. زهرتوني، القبيات

مطعم حجر مخبى بالطبيعة بين الشجر والوديان، بقدم الباستا والبيتز والحلو الطلياني على أنواعو. المميز بهالمحل إنو الشيف طوني بحضر كل شي على إيدو والباستا طازة والخضرا فريش. بتجوا بتقعدوا بهالمحل الموجود بغابات حلسبان، بين الشجر والوديان وبتاكلوا لقمة ايطاليه أصيلة.

الرقم: 844 469 81

٣. بياتزا بيتزا، قرنايل

عندو قعدة حجر مهضومة ومكنكنة بقلب الضيعة، بحضرلكن بيتزا على فرن الحطب وباستا شغل إيد بتخليكن تحسوا بجو الريف الإيطالي وتسرحوا بأفكاركن لبعيد. فيكن تجو مع حدا كتير بتحبوا وترجعوا تستكشفوا الضيعة من أول وجديد.

الرقم: 563 273 81

٤. Un Basilico، بعقلين

قعدة إيطالية بالضيعة يعني رح بتخليكن تنغرموا بالضيعة من أول وجديد، جايبلكن طعمات إيطاليا على صحنكن من بيتزا وباستا وسلطات مع جو رومانسي وأضوية خفيفة وقعدة بار ومشروبات على أنواعها.

الرقم: 810 805 81

٥. Verona Resto The Taste of Italy، السمكانية

القعدة مهضومة ومكنكنة، هالمطعم بيعمل البيتزا الإيطالية والباستا وغيرن من الأطباق الايطاليه بكل إحترافية، طعمتها الغنية ما بتكمل إلا على أطيب كاس نبيد.

الرقم: 088 509 05

٦. لوكاندا كورسيني، بكفيا

مطعم رومانسي قاعد بالجبل بين أجواء تقليدية وجايبلكن الأطباق الطليانية الدافية لي بتحبوها متل البروشيتا واللينغويني والريزوتو وأكيد الحلو عندن ما بيتفوت مع كاس نبيد. وهلق الطقس صار حلو وخرج قعدة الحجر برا الرومانسية مع أضوية خافتة وشراشف بيض.

الرقم: 143 263 81

شوفوا كمان، ١٠ مطاعم بالهوا الطلق بلبنان.