١٥ مطعم مأكولات بحرية مع قعدة على البحر!

“شو في خلف البحر خبريات نايمة بقصور منسية وبحور خلف بحور وحكايات عم تنحكى” مش هيك بتقول الغنية؟ اليوم رح نروح قبال البحر مش خلفو قبالو لنشم ريحتو شوي وناكل من أكلاتو وثمارو الطيبة، مشوا نعرفكن على ١٥ مطعم مأكولات بحرية.

١. شي فؤاد، أنفه

مبلشين مشوارنا بمنطقة أنفه، مخزن التراث الفينيقي بلبنان ونروح تحديداً عند شي فؤاد، بقدم مأكولات بحرية على أنواعها وسمك طازة، عندن بيسين لإذا عبالكن تنزلوا بالمي وحتى فيكن تنزلوا بالبحر.

الرقم: 117 830 70

٢. Le Canoë، ضبيه

مطعم مأكولات بحرية على البحر وبقدم جميع أنواع المأكولات البحرية وأكيد لازم تتركوا ببطنكن محل للحلو، بتخلصوا أكل وبتصوروا المنظر الحلو وبتمزمزوا فنجان قهوة.

الرقم: 111 381 76

٣. السلطان ابراهيم، جونية

من أجمل وأفخم مطاعم السمك لي ممكن تزوروها بلبنان، القعدة عندو على البحر دغري وعندو قعدة جوانية مع ديكور ساحر من عالم الأحلام.

الرقم: 753 853 09

٤. Le Phénicien، صور

من أجمل مطاعم صور على البحر، صيد السمك طازة ومشكل، سمك ع أنواعه، كلامار، كراب وغيرن كتير. هيدا المحل خرج جمعة غير شكل مع العيلة لتستمتعوا بهالطقس الحلو أو حتى لمناسباتكن العائلية.

الرقم: 177 499 01

٥. شي زخيا، جونية

مين ما بيعرف عمو زخيا المعروف بضيافتو ولقمتو الطازة دغري من البحر؟ مش بس هيك، القعدة دغري على البحر وبقدم مازة لبنانية ومأكولات بحرية على أنواعها.

الرقم: 004 911 09

٦. مرشاق على البحر، البترون

بتحبوا البحر كتير؟ هالمطعم قاعد على البحر دغري بخليكن تشموا ريحتو وتسمعوا صوت الموج والمي بدنيكن. بقدم كل أنواع المأكولات البحرية لي بتستحلوها ولي مقدمة بدقة وبكل شطارة.

الرقم: 622 633 76

٧. المرسة، صور

تخايلوا تاكلوا أطيب لقمة على هالمنظر الحلو للبحر وترجعوا تقضوا نهاركن كلو بالمي الصافية؟ بقدم جلسة على شط البحر مع أكل بحري طالع من البحر دغري متل القريدس على أنواعو، الكالامار، وطبق السمكة الحرة بأنواعها وغيرن كتير.

الرقم: 098 000 81

٨. على البحر، جبيل

هالمطرح رح يصير من الأماكن المفضلة عندكن، رح يسحركن بالقعدة الحلوة على البحر والمنظر الساحر لتعيشوا التجربة بكل تفاصيلها. بقدم جميع أنواع المأكولات البحرية وأطباق المازة اللبنانية.

الرقم: 116 541 09

٩. شي رفيق، البترون

بتلاقوا عندن قعدة واسعة ونايمة على البحر لتقعدوا تروقوا أعصابكن على صوت الموج بالنهارات أو على سهرية مع النجوم والبحر بالليل. بجبلكن السمك طازة من البحر وبحضرلكن كل أصناف ثمار البحر مع أطيب التتبيلات.

الرقم: 974 007 70

١٠. فيلوكا، راس بيروت

بقدم قعزة فوق البحر وسمك طازة ولا أطيب. مكان بيطل على جمال البحر وموجاته، من أفضل مطاعم ثمار البحر اللي ممكن تجربوها مع العالم يلي بتحبوهن ببيروت وعندو مأكولات بحرية بتناسب كل الأذواق من سمك مقلي ومشوي، للكاليمار والقريدس المشوي مع التتبيلات المميزة.

الرقم: 200 742 01

١١. باب المينا، جبيل

مطعم دغري قاعد على مينا، عندو أجواء بتاخد العقل، بطل على القلعة وسنسول جبيل وبخليكن تسرحوا بأفكاركن لبعيد. بيقدم أطباق متنوعة من ثمار البحر بجودة عالية إلى جانب مختلف السلطات اللبنانية والبحرية.

الرقم: 475 540 09

١٢. شي وليد، جونية

يلي بيعشق البحر وريحتو لازم يزور هالمطعم، ما في ألذ من القعدة على التراس والبحر تحتكن. بتلاقوا عندو أطباق بحرية متل الأخطبوط، الكالامار القريدس وكمان الأطباق اليومية من السمك الطازة اللي طالع من البحر.

الرقم: 269 239 03

١٣. قمر، أنطلياس

جار البحر والموجات، بيتميز بقعدة مميزة على البحر وعندو قعدة تراس فوق البحر، بقدم كل أطباق المازة اللبنانية من مشاوي تبولة وفتوش وغيرن، عدا عن المأكولات البحرية الغنية والسمك وكلو مقدم على سفرة كريمة ممدودة على عينكن والنظر.

الرقم: 300 710 81

١٤. مانويلا، جونية

مطعم خرج قعدة عائلية وبطل عالبحر دغري، أكلو لبناني ومن البحر من مازة ومقبلات باردة وسخنة وسلطات وأطباق ثمار البحر وعندو بتسمعوا صوت البحر وموجاتو يلي بريح الأعصاب.

الرقم: 000 830 09

١٥. Fidar Beach House، الفدار

يمكن ما رح تقدر الكلمات توصف قدي القعدة هون رح تخليكن تشعروا بالقرب من البحر وبالرواق، عندو كل الأطباق البحرية طالعين من البحر دغري مع ألذ الحلويات والمشروبات، من أجمل المطارح لتتفرجوا على غروب الشمس مع كاس نبيد.

الرقم: 224 477 09

شوفوا كمان، ١٠ مطاعم جبلية خرج ضهرة مع العيلة بلبنان!