قعدة تحت بنفسج الجاكرندا…جوهرة جديدة بمار ميخايل!

لما تتمشوا ببيروت، بتنتبهو أديه هوية المدينة مرتبطة بشجرها وورودها. من اللقطات الربيع للشجر المزهّر بأسواق بيروت، شجر الأكيدنيا المخبى بين شوارعها القديمة، أو ورد ياسمين اللي فايح بكل زاوية منّا! اليوم، رح نخبركن عن  جوهرة مخفية بمار ميخايل، مستوحاة من  شجرة الجاكرندا البيروتية!

شجرة الجاكرندا مشهورة بزهرها البنفسج، و بتلاقوها وين ما كان ببيروت، خصوصي ع الرصيف أو الحدايق العامة. و هالمطرح الجديد بمار ميخايل اسمو “الجاكرندا” مستوحى من أقدم شجرة الجاكرندا ببيروت وعمرها حوالي ال ١٠٠ سنة.

بيجتمع عند الجاكرندا الفن، الموسيقى، الأكل، والروح البيروتية تحت شجرة وحدة. هالمساحة التراثية والمطعم كان عبارة عن بيت لبناني قديم، بنقشات وبلاط بيروتي، عندو سحرو الخاص وحكاياته اللي بيرويها لكل زواره!

وع قد ما حلوة وكلاسيكية القعدة جوا، ع قد ما رح تنغرموا بالجنينة! برّا بتلاقوا قعدة تراس ساحرة تحت بنفسج جاكرندا، بجو تراثي بحسسّكن برومانسيته وجمالو. جوهرة مخفية مناسبة لقعدة رواق تسردوها مع الناس اللي بتحبوهن، أو موعد غرامي حميمي مع حبيبكن! تخايلوا نهار الأحد تسربوا ع هيك مطرح ساحر، تاكلوا لقمة طيب، وتستأنسوا بقعدة بين زهر جاكرندا؟

خبرونا، حبيتوا هالمحل؟ بتلاقوا الجاكرندا Jacaranda تحديداً بشارع القبيات بمار ميخايل، بيروت. ورح يفتح ب ٢٥ أيار، يعني قريباً كتير كتير! ولتتعرفوا أكتر ع المحل، تابعوا حسابن ع الإنستغرام هون. 

بتحبوا بيروت وكل شي فيها؟ شوفوا قسمنا هون.