لكل العزابية… صار فيكن تلاقوا شريك حياتكن ع التيك توك!

بعالم التيك توك متعودين نشوف ظواهر وقصص غريبة، ناس عم ترقص، ترندات أكل، أو أقلها شروق ودكتور فود عم يتخانقو مع بعض ع اللايف، بس ولا مرة توقعنا يصير التيك توك تطبيق للتعارف الجاد والزواج للناس العزابية. 

لكل العزابية بلبنان تخايلوا معنا هالشي: منشورات بإعلانات شخصية لناس عبالها تتعرف وتلاقي شريك أو شريكة حياتها. الإعلانات بتتضمن الجنس، العمر، الحالة المادية، ومواصفات الشريك اللي عبالن يتعرفوا عليه!

وحدة من هالصفحات اللي بتقدم هالخدمة الجديدة هي صفحة @matchmaking15، بخبروكن من أوّلها وبكل وضوح انو “هاي الصفحة للزواج، مش للمواعدة.” 

وفعلاً، لما تتصفحوا حسابن بتلاقوا منشورات جدية بتشبه الكتالوج لأشخاص عم يفتشوا ع شريك يتوافق معن وحسب مواصفاتن. وللصراحة، البعض منن “نيقة شوي” وبيحطوا أدق التفاصيل متل أديه بدّن طول العريس/العروس، لون العيون، الشعر وغيرها. وبظرف شهر واحد، الصفحة وصلت لأكتر من 1000 متابع!

هالخدمات الجديدة ع التيك توك قدمت فرص للعزابية بلبنان وعم تضارب ع الطرق القديمة للزواج التقليدي، يعني ما عاد في لزوم تطلبوا من إمكن أو عمتكن تدبرلكن حدا مناسب! كل اللي عليكن انو تتصفحوا الحساب وتدعوا يجي النصيب.

لكل العزابية اللي عم عبالن يستفيدوا من هالخدمة، بتقدروا تحكوا الحساب على الواتساب هون  وتسجلوا طلبكن! عقبالكن!

خبرونا، شو رأيكن؟ انتو مع أو ضد التعارف ع التيك توك؟

شوفوا كمان، بتصدقوا في تيكتوكر بتعمل reviews للحمامات بلبنان؟