١٠ مطاعم جبلية خرج ضهرة مع العيلة بلبنان!

بما إنو قرب الويك-أند أكيد بلشتوا تشوفوا وين بدكن تاخدوا العيلة كزدورة نهار الأحد وأكيد ما في أحلى من كزدورة بهيك طقس على الجبل بين الشجر والطبيعة الحلوة وبعيد عن الضجة والعجقة. تعوا ناخدكن عالـ  ١٠  مطاعم الجبلية يلي رح تضمنلكن وقت كتير حلو مع العيلة.

١. لا جيراف، ميروبا

هيدا المطعم بقدملكن تجربة عائلية مميزة، عندو أكل لبناني وعالمي بشهي، وحتى وجبات للزغار. كمان عند لا جيراف في كتير ألعاب مسلية لكل الأعمار. بتقعدوا بتاكلوا ع رواق وبتسولفوا والولاد بيلعبوا وبيتسلوا.

الرقم: 335 330 29

٢. شي ميشال، فقرا

هالمطعم المميز قاعد بقلب فقرا وبيتميز بمنظر روعة على الجبل. بتقعدوا بتاكلوا لقمة طيبة مع العيلة وبتشموا هوا نضيف. الضيافة هون فوق الممتازة، والكل رح يعتني فيكن كتير. غير هيك الولاد رح يمبسطوا بالجو الحلو والكزدورة على الجبل.

الرقم: 614 300 29

٣. الفردوس، إهدن

مطعم الفردوس بإهدن إسم عمسمى! في منظر على الجبال والوديان حلو كتير كتير رح يطير عقلكن وإنتو قاعدين عالغدا. في كل أنواع الأكل اللبناني يلي بحبها قلبكن، وولادكن كمان رح يكونوا مبسوطين. ما تنسوا تشربوا فنجان قهوة وترجعوا تتحلوا بأطيب صحن فواكة. الكبة عندن طالعة من الجرن وبتشهي!

الرقم: 701 060 70

٤ طاولة بيوماس، جربتا

بدكن تجربة مميزة بقلب الطبيعة؟ هون رح تعيشوا جو مميز لأن فيكن تقعدوا على الطاولات أو على التكايات وتجربوا كل الطبخات اللبنانية الأصيلة وبس تخلصوا بتشموا هوا نضيف وولادكن بيلعبوا ليشبعوا بالألعاب والمراجيح الموجودة.

الرقم: 532 532 03

٥. طاولة دوما، دوما

ما في أجمل من إنو تروحوا على ضيعة دوما وتقضوا وقت حلو بقلب قصر تراثي بياخد العقل. جربوا كل الأطباق اللبنانية والبيتوتية وهني معروفين بالكبة الدومانية. الولاد رح يمبسطوا بالبوفيه المفتوح ويجربوا كل شي ويسرحوا ويلعبوا بالمساحة.

الرقم: 060 266 81

٦. مطعم الشالوف، جزين

ما في أجمل من القعدة بأحضان الطبيعة بجزين، جلسة الشلالات بتسوى الدني، وعندن لقمة بيتوتية بتفتح النفس عند الشالوف، رح تشوفوا الجمال اللبناني الأخضر مغطى الجبال. الولاد مبسوطين أكيد بمشوار العيلة والأكل الطيب وإنتو كمان.

الرقم: 774 781 07

٧. مطعم فاضل، بكفيا

طلعة عالجبل نهار الأحد ما بتكتمل إلا بالأكل الطيب! مطعم فاضل بقدملكن أشهى الأكل اللبناني بقعدة تراثية أصيلة. من هون بتقدروا تشوفوا بكفيا كلها وبتسرحوا عا منظر جبالنا الحلوة. المطعم دافي وهادي، في كتير ذوق بالديكور جامع بين العتيق والتراث الأصيل، الضيافة ممتازة، والخدمة بتاخد العقل.

الرقم: 079 980 04

٨. جلسة العرزال، حراجل

بدكن تجربة غريبة ومميزة؟ هالمطعم عبارة عن قعدة بقلب عرزال من خشب! تخيلوا قعدة ع الغدا وانتو مأرجحين بالطبيعة بين الشجر! هيدا المطعم بقدملكن هالفرصة الحلوة لتقضوا وقت كتير مميز مع عيلتكن وتطلبوا الأكل البلدي والبيتوتي وتنهوا مع فنجان شاي أو قهوة.

الرقم: 650 711 03

٩. مطعم بحيرة بنشعي، زغرتا

المشوار على بنشعي حرزان مع الولاد، هيك بتاخدوهن مشوار بقلب بحيرة بنشعي بيركبوا الشخطورة وبيعملوا جولة مهضومة بالميات، غير الأكل الطيب في نشاطات للولاد وفي حديقة حيوانات كمان رح يكيفوا فيها الولاد.

الرقم: 500 550 06

١٠. وادي شمسين، البقاع

مطعم متخصص بتقديم الأكل اللبناني وعندو قعدة روعة جنب النهر. وأكيد الولاد رح يكيفوا لأن النشاطات ما بتخلص، ATV، تجديف، paintball، شوفة الحيوانات وغيرها عدا عن الأكل الطيب.

الرقم: 377 677 81

شوفوا كمان، ١٥ سبب بخليكن تزوروا مطعم رامي عياش بالبترون.