٩ مناطق طبيعية رح تدهشكن حول لبنان

لكل محبي الطبيعة، إذا عبالكن تهربوا من العجقة، عنا ليستا ببعض من أجمل الأماكن الطبيعية بلبنان. رح تلاقوا مناطق طبيعية ووجهات كتير رح تدهشكن وتنبسطوا لما تزروروها!

1. عيون أرغش

بحيرة عيون أرغش منطقة طبيعية فيكن تزوروها طول السنة، بس هلق بالصيف بأوج جمالها الحقيقي. خصوصاً إذا عبالكن تستمتعوا بنزهة ع ضفاف البحيرة.

2. درب المسيلحة

للشباب والناس اللي بتحب المشي، درب المسيلحة واحد من أروع دروب المشي بشمال لبنان.

3. وادي قاديشا

وادي قاديشا مليان بكنوز مخفية ومناظر خلابة. جهزوا الصباط المريح، وخدوا تمشاية بقلب هالوادي الرائع، استمتعوا بساعات منعزلين عن العالم بأحضان الغابات والشلالات.

4. أراضي عميق الرطبة

أرضي عميق الرطبة أكبر محمية من نوعها بلبنان وزيارتها رح تأسركن! ومتأكدين أنو رح تنبسطوا خصوصي إذا شفتوا جاموس الميّ المشهور بالمنطقة.

5. الجوهرة الصخرية المخفية بمنطقة حامات

لكل اللي بحبوا يكتشفوا أماكن مميزة مخفية، هالمطرح ع البحر بمنطقة حامات هو المكان المثالي لترتاحوا بعد السباحة.

6. شلالات وبحيرة عيون السمك

منطقة طبيعية بتحتوي ع أروع الشلالات والبحيرات بلبنان، هالمطرح بتحسوا جايي من الخيال، مليان حياة وبيستحق المشوار الطويل.

7. الجدار الفينيقي بالبترون

طالما إجت الصيفية مقصدنا الأول هو البترون، فتأكدوا تزوروا الجدار الفينيقي وتتصوروا جنبو!

8. وادي الصليب بكفردبيان

درب مشي بياخد العقل مغمور بالمساحات الخضرة والنباتات النادرة، وفيكن تقعدوا جنب النهر.

9. بحيرة بنشعي بزغرتا

بحيرة بنشعي هي مقصد روعة للعيلة! اركبوا بقلب القارب، طعمو الوزّات والبط، وما تنسوا تجربوا الغدا من مطعم بحيرة بنشعي، والكبة الزغرتاوية ع أصولها.

حبيتوا هل مناطق طبيعية بلبنان؟

شوفوا كمان، ٩ بحيرات لازم تزوروهن بلبنان!