شو أكبر ضيعة بعكار؟ أكيد مش سامعين فيها!

تل معيان، سامعين بهل إسم من قبل؟ أكبر ضيعة بعكار من حيث المساحة، متل الوردة مخباية بين البساتين، فيها تاريخ طالع من كل حجر وفيها منظر بخلي العقل يطير.

يمكن مش سامعين شي عن هالضيعة. للأسف أخبار تل معيان كانت حزينة بكتير من الأحيان بسبب موت أبناءها بالجيش اللبناني!  بس ما بيمنع هالحكي إنكن تزوروا هالضيعة. فيكن تزوروا هالنقطة الخضرا بعكار وتشوفوا الشمس وهيي عم تغيب ورا الجبل بألوان كتير حلوة.

بترتفع 50 متر عن البحر وفيها أعلى تلة بسهل عكار، إسمها القديم، تل كيري، وتم الإكتشاف فيها أماكن سكنية قديمة وأواني فخارية، بتبلغ مساحتها 4000 دونم وعدد سكانها بيتخطى ال 6000 شخص.

للي بيحب الطبيعة، تل معيان هي جنة بكل معنى الكلمة. هالضيعة بتتميز بغناها بالمواقع الطبيعية وغناها بالنباتات الطبية والعطرية وبتملك أحراج واسعة ومطلة يلي يعتبروا مراكز أساسية للتخييم ولمحبي المشي بالطبيعة.

وأكيد فيكن تتمشوا بهالمكان وتاخدوا أجمل الصور وفيكن تستمتعوا بمنظر غياب الشمس. شو حلو نقضي ليلة تحت ضو القمر والسما الصافية بهالمنطقة الحلوة ونشاهد غروب الشمس من هالمنطقة الخضرا المعزولة عن العالم والعجقة، بالإضافة لأجمل سهرات النار والسهرات الغنائية يلي ممكن تعملوها.

وآخر شي، ما تنسوا تدوقوا مناقيش التنور يللي بتذكركن بريحة عكار القديمة.

شوفوا كمان، أقدم ضيعة بالبترون: من أجمل القرى بلبنان!