عبالكن هوا برود؟ لقينالكن ٨ أماكن صيفية تجربوها برّات بيروت

موسم الصيف بلبنان بيقدملكن تجارب حلوة ومش محصورة بس بوجهات البحر. مع انو الشواطئ بلبنان أكتر من رائعة بالصيف، بس صدقونا لما نقول، فيه أكتر بكتير لتشوفوا وتعملوا من مجرد الاستمتاع بالشمس ع الشط. في تجارب بالجبال، الغابات، الضيع الجبلية الساحرة… لقينالكن ٨ أماكن صيفية مميزة برّات بيروت.

1. شلالات بعقلين

بعقلين هي وحدة من كتير مناطق بلبنان فيكن تلاقوا فيها شلالات مدهشة خلال صيفية. بتقدروا تستمتعوا بالمشي بالطبيعة، تسبحوا بالميّ الصافية، وتاخدوا شوية صور للمناظر الحلوة.

بس اذا كنتوا عم بتدور على مطعم مقابل الشلالات، مننصحكن بـ شلالات الزرقا.

2. أون ذا روتس، سرجبال

هالمطرح عبارة عن منتزه ومخيم بقلب غابات سرجبال الشوفيّة. بيقدموا ملاذ مثالي بعيد عن حياة المدينة. فيكنتقضوا كم يوم ع ضفاف النهر، تسبحوا وتسردوها مع أصحابكن، وتكتشفوا شو الطبيعة اللي حوليكن مخبية من جواهر مخفية.

الرقم: 834 711 71

3. كافيه وبار GreenHouse ,البترون

صح البترون معروفة انها عروس الساحل ووحدة من أفضل وجهات الصيفية، بس في جوهرة مخباية ع تلال البترون بتقدملكن كمان تجارب حلوة. قضوا نهار كامل، تمشوا بالسوق العتيق، دوقوا الليموناضة البترونية،، ومن بعدها ارتاحوا ع شط البحصة، وخلصوا نهاركن  بمنظر الغروب من GreenHouse اللي بتطل ع الساحل بأكملو.

الرقم: 310 125 70

4. بيت القمر ، دير القمر

مطبخ بالهوا الطلق وبيت ضيافة بتراس خارجي رائع بتقدروا تستمتعوا فيه بالأطباق المحلية الشهية، والأكلات المطبوخة البيتوتية، وأكتر!

الرقم: 411 661 03

5. ع هواك، مزرعة النهر

استمتعوا بوجبة شهية ع صوت الميّ الجارية! مطعم ع هواك عندو سفرة بالطبيعة لتتلذذوا بأطيب المأكولات اللبنانية ع ضفاف النهر.

الرقم: 970 650 81

6. شلالات كفرحلدا

كمان شلالات كفرحلدا من أروع الشلالات بلبنان اللي لازم تحطوها وجهة مميزة للصيفية! 

7. تلّة، الكورة

مطرح هادي لجمعات الاصحاب. اذا بتعشقوا الأماكن اللي مناظرها خيالية، فيك تخطط لزيارة تلّة بالكورة خلال الصيف.

الرقم: 674 757 76

8. لابيكاس، الشبانية

هالمطعم قاعد بقلب كوخ خشبي وجوهرة بالطبيعة بتحبس الأنفاس. الشبانية منطقة من الأمثل لتستمتعوا بالصيف، مع نسمة هوا باردة ولقمة مازة لبنانية. وبعدها فيكن تروحوا تتمشوا وسط الغابات الخضرة! 

الرقم: 792 491 70 – 788 004 71

شوفوا كمان، ٩ محلات فيكن تعملوا فيهن مشاوي بالطبيعة!