٧ مطاعم قاعدة بين الورود بلبنان!

بهيدا الطقس الحلو، أحلى قعدة بتكون بتضمن بالتأكيد الورد والطقس الحلو، وبالتالي نحن جمعنالكن ٧ مطاعم مفضلة عنا فيها ورود. هال ويك-أند بدل ما يكون عندكن خطط بتزهق، شوفوا واحد من هالمطاعم تروحوا علين.

١. روت 829، حصرون

بلش يزهر الربيع وبهيدا المطعم ناطرتكن قعدة بقلب جنينة موردة ومقاعد خشب ملونة مع أضوية خافتة وأكلات عالمية وأطيب الحلويات والمشروبات.

الرقم: 829 000 71

٢. إي كافي، جبيل

شو بدنا نخبركن عن هالمحل، غير إنو قاعد بقلب السوق العتيق بجبيل، محاط بالزهر المندندل، عندو أكلات عالمية وحلويات على أنواعها بالإضافة للمشروبات والترويقة البلدية يلي كلنا منحبها. ما في أجمل من القعدة على التراس والكراسي الملونة بين الزهر والورد.

الرقم: 316 163 03

٣. جلسة ورد، يحشوش

إسم على مسمى، عبارة عن جلسة ورد بأحضان الطبيعة قاعد على الشير، الفيو من هالمحل رح ياخدكن على عالم التاني. رح يوزعوا عليكن شراب الورد أول ما تفوتوا، عندن كل أطباق المازة اللبنانية وبيتميزوا بطبق وردي بإمتياز: فتة الورد!

الرقم: 014 273 03

٤. كيف، جزين

هالمطعم مورد ومزهر وبخلي الشخص يحس حالو بالجنة، قاعد بضيعة حلوة كتير وبتطل على أجمل شلالات. بحضرلكن أشهى الطبخات البيتوتية الشهية والتحلايات يلي بتستحلوها ضمن جو وردي جبلي.

الرقم: 449 441 70

٤. بيت الجبل، دير القمر

بيت جبل من حجر عندو قعدة مطعم برانية، مراجيح وفيو بطير العقل على الجبال والوديان، بتاكلوا أطيب لقمة لبنانية أصيلة وبتشموا ريحة الورد وريحة الطبيعة.

الرقم: 767 160 71

٥. الشلالات الزرقا، بعقلين

مطعم بيجمع بين الجلسة الحلوة وقعدة المي بمطرح واحد، قاعد بين الشلالات وعندو شخطورة بنص المي وفيها ورود حواليها. بقدموا جميع أصناف الأكل اللبناني، فعلاً جنة من جنات الشوف.

الرقم: 301 560 03

٦. الأزوردي، اللقلوق

مطعم وردي ويعتبر وردة من وردات اللقلوق. بيقصدوا الزوار بالصيف وبالشتا، بالربيع وبالخريف، بالتلج وبالشوب لأن بكل فصل إلو قصة. وهلق صارت الدني موردة وعطر الورد معبى المكان.

الرقم: 868 888 76

٧. ورد كافي، حدث الجبة

كافي بيشبه بيت التيتا والجدو، بتقعدوا على طاولة خشب مع غطا مطرز متل تبع التيتا. على الطاولات بتلاقوا ورود، حتى بتلاقوا عندن شراب ورد معمول على الإيد.

الرقم: 652 621 03

شوفوا كمان، ١٠ مطاعم بالهوا الطلق بلبنان!