٩ محلات فيكن تعملوا فيهن مشاوي بالطبيعة!

في أحلى من قعدة مشاوي؟ أو المشاوير الحلوة بالطبيعة اللي بتفرفح القلب وبتروق الأعصاب! مشوا معنا على ٩ مطارح حول لبنان فيكن تعملوا فيهن مشاوي بقلب الطبيعة.

١. مغراق، عبدلي البترون

هالمحل عبارة عن قرية بتسبح بالمي، فيكن تجوا على البيت المهضوم الموجود بقلبها، بتقعدوا على التراس وبتعملوا حفلة مشاوي على المنقل، وبترجعوا بتشووا بطاطا على الفحم وبتعملوا ركوة قهوة على المنقل.

الرقم: 878 877 71

٢. لو كامب، دير الحرف

عيشوا تجربة بقلب الطبيعة عند هالمحل، فيكن تخيموا أو تجو بس لتقضوا نهار بقلب الطبيعة وبعيد عن العجقة والضجة. بتعملوا حفلة مشاوي على الرايق وبتقعدوا بهالبرودات مع هالمنظر الحلو والجمعة الحلوة.

الرقم: 677 355 76

٣. فالي كامب، صوفر

هيدا المحل عبارة عن محل للتخييم بقلب الطبيعة، بتلاقوا في بيوت خشب، وبتقدروا تعملوا مشاوي وبرغر والجمعة الحلوة بتحلي القعدة وبتستمتعوا بالمناظر المحيطة الجميلة.

الرقم: 082 312 03

٤. ذا باين ياردز The Pine Yards، مار موسى-الدوار

بتجوا مع العلية والأصحاب، بتستمتعوا بالقعدة بالطبيعة، بتعملوا حفلة مشاوي على رمرمية، وإذا ما بدكن تاخدوا أكلاتكن معكن، فيكن تطلبوا من المطعم يلي عندن وتتغدوا بأحضان الطبيعة.

الرقم: 629 281 03

٥. أرصون فيلادج، أرصون-المتن

هالمحل المليان بالشجر والطيور وبيوت الخشب، عندن قعدة مميزة بقلب الطبيعة بتخليكن تحسوا بأجواء الربيع. فيكن تحضروا أكلاتكن وتعملوا مشاوي بالطبيعة. جمعوا أصحابكن وتوجهوا ليوم من الطعام الطيب والمناظر الخلابة.

الرقم: 111 228 71

٦. حديقة راس مسقا، راس مسقا-الكورة

فيكن تستأجروا المحل وتعملوا ذكريات حلوة كتير بقلب الطبيعة، بتعملوا بيكنيك ومشاوي وبتتسلوا وبتشوفوا مغيب الشمس كمان. الشجر هني العناصر يلي رح تخليكن تنغرموا بهالحديقة.

الرقم: 470 170 79

٧. رشانا كامبينغ، البترون

هيدا المحل هوي كل شي حتحتاجو لتقضوا يوم من الاسترخاء بالطبيعة. وغير المناظر الساحرة، القعدة تبعن حتسحركن كمان، يللي بيتضمن مساحة لتحضروا فيها مشاوي أو تناموا بالجرد.

الرقم: 319 993 70

٨. لا بوهيم، مار موسى

بوفرلكن محل للبيكنيك وللشوي مع قعدة، ومناظر المحيطة خلابة وإذا ما عبالكن تاخدوا أكلاتكن معكن فيكن تطلبوا أكل من المطعم الموجود هونيك، بس أكيد أحلا جمعة بس تاخدوا معكن الأصحاب والناس يلي بتحب قعدات الطبيعة.

الرقم: 591 432 76

٩. سوينغز، زرعون

مخبى بقلب المتن ومن أروع المطارح لتجربوها بالطبيعة، عندن محل لتمارسوا لعبة اللايزر، ألعاب للولاد، مراجيح، أكل، طبيعة ساحرة، نشاطات حماسية، قعدة بالجنينة، ومحل لتحضروا مشاوي بالطبيعة بالهوا النضيف وقصص كتير حلوة، تتعرفوا على هالمنطقة الجبلية وبتنبسطوا بالطقس الحلو.

الرقم: 648 796 03

شوفوا كمان، ١٠ مطاعم بالهوا الطلق بلبنان!