١٠ مطاعم قاعدة بالهوا الطلق بلبنان!

لبنان مشهور بمناظرو الخلابة وأكيد بأكلو الطيب كتير. شو في أحلى من قعدة بمطعم بالهوا الطلق مع سفرة مفتوحة بهالطقس الحلو؟ خلونا ناخدكن على ١٠ مطاعم قاعدة بالهوا الطلق بلبنان.

١. طاولة دوما، دوما

هالمطعم قاعد بقلب ضيعة دوما، بيقدملكن تجربة أكل لبناني أصيل مع جلسة برا كتير حلوة. بتاكلوا، بتشموا هوا نضيف وبترخوا أعصابكن قدام منظر الجبال الشامخة.

الرقم: 060 266 81

٢. ساكينة، فتقا

غوصوا بعالم من المقبلات اللذيذة والباستا وغيرها من الأصناف الايطاليه والفرنسية، كل هالجمال وإنتو عم تتمتعوا بمساحة خضرا مليانة شجر مع فيو للجبال والوديان برد الروح.

الرقم: 225 522 70

٣. روت 829، حصرون

ع الطريق العام بحصرون، رح تلاقوا مطعم بيقدم أطباق لبنانية تقليدية بطريقة عصرية وحديثة وكمان جايبلكن أطباق عالمية، كل هيدا مع هوا جبلي وجو بنسيكن كل شي. عندو قعدة بالهوا الطلق بقلب جنينة وتحت الشجر والخضار، مكان مزين بالأضوية الساحرة وورد الجبل.

الرقم: 829 000 71

٤. الطاحونة، بعقلين

رجعوا للماضي شوي عند طاحونة الهوا واستمتعوا بأشهى الأطباق اللبنانية من مشاوي، مازة، معجنات، بطاطا حرة وبطاطا مقلية وكل شي طيب وسط أجواء دافية ومفتوحة ع وتر المي وريحة الشجر والطبيعة.

الرقم: 802 885 76

٥. بيوماس، جربتا

للي بيحبوا الأكل الصحي والريفي، بيوماس هوي الخيار المثالي. كل الأكل عندن طازة وبيتوتي والقعدة بالطبيعة رح تسحركن… مراجيح، طاولات وكراسي خشب، مزرعة، حيوانات، قعدة بالغابة، مشروب وعصير، ورود وأكل كتير طيب.

الرقم: 532 532 03

٦. بيت الجبل، دير القمر

خلو بيت الجبل ياخدكن بجولة على تاريخ لبنان العريق، مع سفرة غنية بأشهى الأطباق التراثية اللبنانية، كل هيدا بقعدة برا كتير حلو. قاعد فوق الوادي، بيطل على أجمل المناظر الجبلية وبيتمتع بأجمل تراس مفتوح مع مراجيح.

الرقم: 767 160 71

٧. La Maison de la Forêt، جزين

هيدا مش بس مطعم، هوي بيت بنص الغابة! استمتعوا بأشهى الأطباق اللبنانية مع أجواء الطبيعة الخلابة. عندو اللقمة اللبنانية الأصيلة، والترويقة البيتوتية ع البلدي بين شجر الصنوبر وريحتو لي بتشق القلب، والقعدة الشرحة بحضن الطبيعة.

الرقم: 222 800 07

٨. فريدة، عجلتون

فريدة بعجلتون رح يسرق قلبكن! مطعم يقدم أكل لبناني راقي مع لمسة إبداعية خاصة فين. مكان بتفوح منو ريحة شجر الزيتون والأكلات يلي بتشق القلب. عندو قعدة تحت المصابيح وبيت الشجر وعلى المراجيح.

الرقم: 511 835 71

٩. دير القمرا، دير القمر

هالمطعم قصة ضيافة عريقة. تذوقوا أشهى الأطباق اللبنانية الأصيلة ضمن أجواء عائلية دافية ومفتوحة على القناطر. مطعم بيتميز بالديكور التراثي وبتلاقوا كل التفاصيل بتاخدكن على قصور الأمرا المعنيين بالجبل، مكان مميز لتجربوا لقمة طيبة وقعدة ملوكية مع العيلة والولاد.

الرقم: 557 511 05

١٠. إكسير، البترون

إكسير بالبترون رح يترك بصمة مميزة بذاكرتكن. بقدم الأطباق الفرنسية واللبنانية مع إطلالة ساحرة على جرود البترون، كل هيدا مع قعدة برا كتير حلوة. بتلاقوا حالكن معزولين بقلب الجرد عم تشموا ريحة النبيد، تجربوا الأصناف المختلفة وتاكلوا لقمة طيبة وتاخدوا أجمل الصور.

الرقم: 464 700 70

تذكروا وإنتو وعم تتمتعوا بهالتجربة المميزة من الأكل المفتوح، إنو تستمتعوا مش بس بالنكهات الطيبة، بالجلسة الحلوة، والرفقة الحلوة كمان، هالاشيا هي اللي بتخلي جلستكن أحلى وأحلى.

شوفوا كمان، ٦ نشاطات مسلية للولاد بلبنان.