١٠ مطاعم مع قعدة جنينة حول لبنان

مين فينا ما بيحب قعدة الجنينة بالهوا الطلق وبين النسمات الحلوين؟ خلونا نخبركن عن ١٠ مطاعم مع قعدة جنينة حول لبنان. 

1. جلسة ورد، يحشوش

مطعم قاعد ع حفة الجبل وعندو إطلالة ع وحدة من أروع الجنّات الخضرة بلبنان: يحشوش. بيتميز بتقديم الأكل الطيب على قعدة بجنينة وبالهوا الطلق. 

الرقم: 014 273 03 

2. مطعم مكان، مار مخايل

إذا عبالكن تجربوا الأكل الهندي والفارسي مع جو كلاسيكي ورومانسي، لقينالكن هالمطعم المميز ببيروت. بتلاقوا بقلبو حديقة سرية مع قعدة بيتوتية لطيفة ع الآخر. 

الرقم: 057 954 70  

3. مطعم منير، برمانا

الطلعة ع برمانا بهالطقس مميز كتير، وما بتكمل من دون ما تزوروا واحد من أفضل المطاعم اللبنانية بالمنطقة. عدا عن انو مطعم منير حلو للقعدات العائلية وعندو قعدة ملوكية، بس كمان عندو جنينة مغمورة ورود من كل الألوان. 

الرقم: 900 873 04 

4. مطعم وادي شمسين، برالياس

مطعم قاعد بواحة من الخضار والجنينات بربوع البقاع الغربي. مش بس عندو إطلالة روعة ع المناظر الجبلية بالمنطقة، بس كمان قاعد جنب النهر، مع جسور زغيرة، ملاعب للولاد، قوارب لتطلعوا تتفرجوا ع البط، وفوق هيدا كلو بيعمل سفرة لبنانية بتشهي. 

الرقم:  377 677 81

5. Iris domain، بحمدون

ممكن عبالكن جو رومانسي بين كروم العنب مع كاس نبيد لبناني وريحة الجبل، كرمال هيك لازم تزوروا هالمطعم والمعصرة بالهوا الطلق. 

الرقم: 879 900 78 

6. مطعم بيوماس – جربتا، البترون

ضهرة العيلة رح بتكون غير شكل عن بيوماس! عندن ملاعب للولاد، مساحات خضرة، بوفيهات للطبخ اللبناني الأصيل، وجنينات حلوة لتفرشوا الحصيرة وتعملوا نزهة مع الناس اللي بتحبوهن. 

الرقم: 532 532 03  

7. بيت، مار ميخايل

تخايلوا فيكن تعيشوا جو الطبيعة والرواق بنص بيروت! بيت عبارة عن كافيه ومطعم على طراز البيتوتي القديم، بيقدم قعدة كلاسيكية وجلسة بين الورد وتحت فيّ الشجر بمار مخايل. 

الرقم: 390 761 76 

8. طاولة عميق – عميق، البقاع الغربي

سوق الطيب معروف انو عندو مطاعم بوفيهات بمختلف المناطق اللبنانية وأشهرها طاولة عميق اللي بتطل ع سهل البقاع بأكملو. مع قعدة بقلب جنينية بالهوا الطلق والأكل البقاعي الأصيل، كتير رح تنبسطوا. 

الرقم: 481 004 03 

9. روت حصرون، حصرون

عيشوا جمال الربيع بوردة الجبل حصرون عند مطعم روت، عندو أكل عالمي بيشهي وقعدة تحت الفيّات كتير حلوة. ولما تخلصوا ما تنسوا تتمشوا بالضيعة وتكتشفوها!

الرقم: 829 000 71 

10. مطعم فريدة، عجلتون 

إذا عبالكن لقمة جبل ع أصولها وجلسة بقلب جنينة مع العيلة، لازم تجربوا مطعم فريدة! 

الرقم: 511 835 71

أي رح تختاروا من هل مطاعم مع قعدة جنينة بلبنان؟ 

شوفوا كمان، ٩ مطاعم خيالية معلّقة بالسما حول لبنان