تعرفوا على أشهر عادات عيد الفطر بلبنان

ما في أحلى من شهر رمضان، إلا عيدو! وعيد الفطر يعتبر من أهم الأعياد بلبنان والدين الإسلامي، وأكيد ع عادتن اللبنانية، هيك أعياد بتكون للكل شو ما كانت الطايفة أو الدين للشخص. كلنا منحتفل سوا ومنعيّد سوا، وهالشي اللي بميزنا نحنا اللبنانية عن غيرنا. وأكيد كتار بينطروا ليجتمعوا مع القرايب، يعيشوا جو الفرحة مع الناس اللي بيحبوهن، ويضهروا، وغيرها من الاحتفالات الحلوة. اليوم قررنا نخبركن عن أشهر عادات عيد الفطر بلبنان! 

١. تحضيرات ما قبل العيد من زينة وحلويات وتياب العيد

بتلاقوا كتير ناس بتزيّن بيتها ع العيد لتستقبل الزوار، بتحضّر الحلويات للكبار والزغار كنوع من الضيافة، عدا عن البخور تحضير تياب العيد. ومن زمان كان شراء تياب العيد الجديدة تجيب فرحة كبيرة للولاد! والكل بالعيلة بيكون ناطر ليشوف التاني شو لابس ع العيد! 

٢. العادات الدينية نهار العيد

بالعادة بيصير تهليل وتكبير بالجامع أول ما يثبت رؤية الهلال الأول لشهر شوال الهجري. بيجتمعوا كل الناس بمسجد الضيعة أو المدينة لأداء صلاة العيد من الصبح بكير، وبعدها بيصير في خطبة زغيرة.  

ومن بعد الصلاة بلبنان بروحوا الناس لزيارة المقابر للترحم ع الموتى. وهونيك بوزعوا معمول، وكتار بيتصدقوا بالمصاري. ومن بعدها الكل بيتوجه ع بيتو ليحضر للزيارات اللي جاية! 

٣. العادات الإجتماعية من زيارة القرايب وضيافة الحلويات الشرقية

من بعد لبس تياب العيد، بتبلش العادات الإجتماعية من زيارات للقرايب البعاد أو القراب وبتضل من الصبحية لآخر النهار. وأغلب الناس اللي بتكون عايشة بالمدينة، بترجع ع الضيعة بهالنهار، وبيبقوا خلال أيام العيد.

 ومن أكتر العادات الشعبية الشهيرة عنا بلبنان ع الأعياد هي توزيع الحلويات الشرقية وخصوصي  المعمول، إن كان بالفستق أو التمر. كمان بتلاقوا كعك العيد، البقلاوة، علب الشوكولا والملبس والبون بون وغيرها للولاد. وخلال الزيارات، بيجي وقت العيدية والألعاب والهدايا وبالأكترية للولاد، إلا إذا كبرتوا ع العيدية. 

ويمكن من أكتر مظاهر العيد اللي منشوفها بلبنان هي المهرجانات خصوصي بصيدا وطرابلس! وإذا ما في مهرجان لكن أكيد في ضهرة، ممكن غدا بمطعم، أو روحة ع مدينة الملاهي، أو الأماكن الترفيهية القريبة، وبتقضوا النهار كلو هونيك! 

ومن عيلة بيروت.كوم منعيّدكن ومنقلكن كل عام وانتو بألف خير! وخبرونا بالتعليقات، شو في عادات عيد الفطر خاصة بتعملوها؟ 

شوفوا كمان، فرحة العيد: أجمل أغاني عيد الفطر من الطفولة!