تعرفوا على ٩ محلات بوظة شغل إيد بلبنان!

في ناس بتحب تاكل بوظة شغل إيد وما تكون اصطناعية، ونحنا منن. لأن البوظة ما بتنجاب من وين ما كان، حبينا نعرفكن على ٩ محلات بتحضر بوظة شغل إيد بلبنان.

١. بوظة حنا متري، الأشرفية

محل صار من تراث بيروت العتيق وأكيد إذا ما بتعرفوا سامعين في. اشتهر بجودة البوظة وطعمتها المميزة، سر الخلطة إنها طبيعية خالية من الألوان والقصص الإصطناعية، ومعمولة دق وبتاكلوها وبتمبسطوا فيها وكل مرة بترجعوا لتجربوها.

الرقم: 356 254 03

٢. بوظة رشيد عطا، زحلة

بيت البوظة العربية، بحضر على إيدو أطيب وأشهى أنواع البوظة، عندو أطيب النكهات متل الورد، القشطا، الفستق، التوت البري وغيرن. الطعمة والريحة ما فينا نوصفهن، والكمية كبيرة وكريمة.

الرقم: 433 824 08

٣. بوظة مارون، بشري

مارون بيعمل بوظة دق بمواد طبيعية ولا أطيب، من الفواكة للشوكولا والفانيلا والحليب. بيعمل كمان إختراعات كتير مهضومة متل البوظة على كيوي وبوظة على تين وجوز وبوظة على أناناس.

الرقم: 195 288 03

٤. بوظة الزحلاوي، دوما

^{Credits: NoGarlicNoOnions}

محل قديم وتراثي بالمضيعة، محبوب عند كتير بسوق بدوما بيعمل مختلف العطمات العربية ع الطريقة البيتوتية التقليدية.

^{Credits: NoGarlicNoOnions}

الرقم: 909 576 03

٥. L’atelier des Glaces، بعبدات

هالمحل بحضر نوع البوظة level 5 يلي موجود بس ببعض البلدان الأوروبية وما بيشبه الأصناف التجارية الموجودة بالسوق ويلي كلها سكر. عندن كل النكهات، التقليدية والمبتكرة بكل فن وشغف. أطيب شي الشوكولا بالويسكي الشهيرة عندن، مزيج سماوي بين الكاكاو الغني وقطرات الويسكي اللذيذة. كتير طيبة وأبداً مش دلعة ولا تقيلة.

الرقم: 741 657 03

٦. بوظة عواد

بيعمل بوظة عربية على مختلف الطعمات والنكهات متل الفواكة والفستق والقشطا، سر الخلطة إنها طبيعية، ما بيستعملوا أي نكهة ولا ألوان يعني بقدموا شغلن من قلبن وبيشتهر بخلطة خاصة جامعينا بين المتلجات العربية واللبنانية وطعمة الفستق.

فرع غزير: 318 831 78
فرع عشقوت: 547 301 03

٧. Booza

معمل بوظة حرفي بوصلكن ألذ وأطيب أنواع الآيس كريم مع تشكيلة نكهات مميزة. كل شي طبيعي وفريش وما في شي مصنع، استبدلوا مستخلصات النكهة بالفواكة الحقيقية. بتحسوا حالكن عم تاكلوا فواكة طبيعية بس متلجة.

برمانا: 307 309 79
الجميزة: 880 805 71
النقاش: 118 124 81

٨. Le Flocon Artisan Glacier

هالمحل بيعمل بوظة بطريقة فنية واحترافية، محض على الإيد من مكونات طبيعية وفواكة طازة، كل نكهة عندن تحفة فنية وحتى بيعملوا غاتويات على بوظة.

النقاش: 602 402 04
الأشرفية: 240 333 01

٩. Evasion Chocolatier-Glacier، الأشرفية

عشاق الشوكولا والآيس كريم، لازم تزوروا هيدا المحل لي صرلو من 1992 عم بحضرلكن أصناف حلو مميزة، بحضروا الشوكولا المعمولة على الإيد والفاخرة يلي فيكن تجربوها عندو أو تهدوها، ويلي بميزوا إنو البوظة شغل إيد، قطع فواكي طازة وبوظة كريمية ولا أطيب. بحضروا كمان سوربي بوظة على شكل كايك قطني على عدة نكهات وطعمتو من غير عالم.

الرقم: 284 917 03

شوفوا كمان، أطيب ٩ محلا “كوكتيل شقف” حول لبنان.