أطيب ٩ محلات “كوكتيل شقف” حول لبنان

كوكتيل الفواكة اللبناني، أو ما يعرف ب”كوكتيل شقف”، كلنا كنا نستلذ فيه من أيام ما وعينا ع هالدني. وللصراحة، مين بيقدر يقاوم عصير فريش مع قطع الفواكة المشكلة و القشطة اللبنانية الطيبة؟ بما انو الطقس بلش يدفى، كتار منّا بيخطر عبالن مشروبات منعشة ولذيذة. كرمال هيك، جبنالكن أطيب ٩ محلات “كوكتيل شقف” حول لبنان.

1. العنتبلي – مار الياس، الحمرا، سوق بيروت

العنتبلي أقدم محل كوكتيل بلبنان، وصرله من ١٩٣٦ بيقدم أطيب الكوكتيلات ببيروت. فيكن تجربوا عندو كوكتيل فواكة شقف ع أصولو أو كوكتيل الأفوكادو مع القشطة الشهيرة اللي بيعملها والمكسرات المقرمشة. كمان مننصحكن تجربوا عندو القشطلية والبوظة الإيطالية اللي بيتفنن فيها! 

الرقم: 326 739 01

2. بي فريش كوكتيل – ساحة ساسين، الأشرفية و الزلقا

ميلوا عن بي فريش وجربوا كباية كوكتيل فواكة مع قشطة وأفوكادو ورشة من العسل الطبيعي، وصدقونا رح يبورد قلبكن من جوا! 

الرقم: زلقا 822 879 01 – الأشرفية 949 696 76 

3. كوكتيل لحود – الدورة

شو بتفضلوا كوكتيل الفواكة شقف ولا كوكتيل الأفوكادو مع العسل والمكسرات؟ للصراحة، عند كوكتيل لحود ما رح تحتاروا وعندو كل شي طيب وفريش! 

الرقم: 206 265 01

4. Tasty Bees  – فروع كافة

محل تايستي بيز مشهور انو بيتفنن بعالم الحلويات، من سلطات الفواكة الشهية للغاتو بتقديم مميز. مننصحكن تجربوا عندو كوكتيل التوت اللي بيشهي، بقلبو كذا نوع من التوت مع الفواكة الexotic ، قطعة من العسل الطبيعي، وطبقة من الأفوكادو الطيب!

الرقم: صفير 804 278 01 – القائم 704 558 01 – بشارة الخوري 501 669 01

 شويفات 801 998 81 – طريق المطار 073 230 71 – 028 455 01

5. توب فريش، جل الديب

كوكتيل الفواكة عند توب فريش غرام بحد ذاتو. بتلاقوا عندو كل الفواكة بأنواعها وحتى الExotic!  بس كمان بيبدع بكل كباية، من ناحية الطعمة، والتقديم، عدا عن صحون الفواكة اللي بيعملها والميني كريب بنكهات استثنائية. 

الرقم: 263 705 71

6. Papaya Cocktail، طرابلس

ممكن من ألذ الأشيا اللي فيكن تجربوها بطرابلس هي كوكتيل الأفوكادو بالفستق عند بابايا كوكتيل. محشية فستق ع الآخر، مع قرمشة وطعمة غنية بكل ملعقة! 

الرقم: 105 446 06 – 999 155 71

7. كوكتيلا، صيدا 

محل إنشهر كتير بصيدا انو بيعمل كوكتيل لبناني بأحجام كبيرة، وبتشكيلة واسعة من الفواكة اللذيذة والفريش.  وإذا فيه شي لازم تجربوا مع كباية الكوكتيل عندن، هو صحن القشطة اللي بيعملوا! 

الرقم: 155 515 71 

8. كوكتيل مارون – جب جنين، البقاع الغربي

البقاع كلو بيمرق عند كوكتيل مارون ليدوق الكوكتيل اللبناني ع أصولو! هالمحل صرلو فاتح من ١٩٧٣ ويعتبر ملك الكوكتيل والبوظة بالمنطقة.

الرقم: 962 264 70

9. كوكتيل القدوم، جبيل

شغليتن لازم تدوقوهن عند كوكتيل القدوم لما تطلعوا ع جبيل: كباية فواكة شقف والبوظة العربية! 

الرقم: 667 546 09 – 314 944 09

خبرونا، شو بعد بتحبوا محلات كوكتيل شقف بلبنان؟ 

شوفوا كمان، أفخر نوع كنافة نزل ع السوق: كنافة الداعوقية!