٨ شطوط وبحور مجانية فيكن تزوروها قبل ما تبلش الصيفية بلبنان!

صح بعد ما بلشت الصيفية بلبنان وصح بعدنا مبلشين بالربيع، بس الهيئة الطقس الصيفي السنة مشرف قبل وقتو وكلنا شفنا هالجمعة الشوبات والعبوق وحسينا عبالنا نروح نتشمس لأن عنجد الحرارة صارت مرتفعة نوعاً ما. لهيك جبنالكن مجموعة من الشطوط والبحور المجانية يلي ممكن تزوروها بلبنان قبل ما تفتح البيسينات والمنتجعات بوابا لهل موسم لتقضوا وقت وحلو وتتشمسوا، بعض هالشطوط الشعبية مفتوحة للجميع بتوصلولن دغري والبعض الآخر بدكن تزوروا المطعم وتاكلوا وترجعوا تنزلوا على البحر.

الشطوط لي ممكن تزوروها من خلال المطاعم

١. Colonel Reef، البترون

بتجوا بتقعدوا عندن وبتاكلوا أطيب المأكولات البحرية والسمك، بتقدروا تشربوا بيرة باردة وتسمعوا موسيقى كمان وبتتفرجوا على المغيب من هل نقطة وأكيد الدخول على الشط مجاني.

٢. Dany’s Beach Restaurant، البترون

الشط رملي وحلو كتير، والمي في صافية ونضيفة. بس لأنو كتير حلو، ممكن يكون في عجقة بالصيف، لازم تبقوا تروحوا بكير لتلاقوا مطرح، أما هلق بعدو الموسم بأولو. الدخول عالشط ببلاش بس أكيد لازم تزوروا المطعم وتطلبوا أكل وبترجوا بتنزلوا على الشط.

الرقم: 825 929 03

٣. Joining Beach، كفرعبيدا

عبارة عن شط صخري مجاني مممكن تزوروا بحيلا وقت من السنة، بتمدوا مناشفكن على الصخرة وبتستمتعوا بمي وشمس البترون الروعة. وإذا عبالكن بتاكلوا من المطعم وبتعيشوا لحظات استثنائية.

الرقم: 492 517 03

٤. شط Pierre and Friends، البترون

ما إلكن غير تتوجهوا مع أصحابكن على البترون وتميلوا عند هالمطعم، بتاكلوا لقمة على السريع وبتقضوا نهاركن كلو على البحر.

الرقم: 930 352 03

الشطوط والبحور العامة

٥.شط عمشيت العام، عمشيت

شاطئ عمشيت العام هوي شط مجاني ببلدة عمشيت. يعتبر من أجمل أماكن للسباحة ولتقعدوا بالشمس وترتاحوا مع الأصحاب والأهل. البحر نضيف وفيكن تتصيدوا في كمان، أو تجوا بس لتتشمسوا وتتسبحوا. بتقدروا كمان تستفيدوا من مسارات المشي وركوب البيسيكليت بالمنطقة.

الرقم: 930 352 03

٦. شط جبيل العام، جبيل

زوروا الشط العام لي قريب من الآثار القديمة، عبارة عن بحر رملي مفتوح للجميع. كتير نضيف ومرتب، مش بس هيك، قريب من المطاعم والكافيهات بالمنطقة، لإذا عبالكن تاكلوا شي بعد نهار طويل بالشمس.

٧. البحصة، البترون

رح تلاقوا بالبترون عدة شواطئ عامة فيكن تفوتوا عليها من دون ما تدفعوا. أحلا شي بشط البحصة إنو مجاني ونضيف ومرتب، وبتقدروا تستمتعوا بالشمس والرمل من دون ما تدفعوا شي. في كمان كتير مطاعم وكافيهات كتير لذيذة عالبحر وقريبة كتير.

٨. شط شكا العام، شكا

البحر كتير حلو وناعم في مي صافية ومناظر حلوة، بتجوا وبتجيبوا معكن منشفتكن وغراضكن وأكلاتكن وبتتشمسوا كل النهار.

شوفوا كمان، بيت ضيافة حجر من الأحلام ناطركن بأنفه!