١١ كافيه لطيف بيرجعوكن ع أيام زمان بلبنان

مشوا نرجع بشريط الزمن لورا، وناخدكن على أماكن ع الموديل القديم بتحسّسكن برومانسية و نوستالجيا الزمن الجميل. مشوا معنا نتعرف سوا على ١١ كافيه لطيف بيذكروكن بأحلى أيام زمان بلبنان. 

1. بيت إم نزيه – شارع عبد الباقي، الحمرا

بيت إم نزيه عبارة عن كافيه تراثي بالحمرا جايي من أيام زمان. إذا بتحبوا القصص القديمة رح تستمتعوا كتير بالمطرح ، من الطبخات البيتوتية، وكراسي الخشب بين الزريعات، والبلاط البيروتي القديم اللي بيذكركن بعزّ أيام شارع الحمرا. 

الرقم: 397 742 01

2. بيت كافيه، مار مخايل

لعشاق الرومانسية والتفاصيل الزغيرة، إخترنالكن بيت كافيه كواحد من أجمل الكافيهات اللي بترجعكن ع أيام زمان. هو عبارة عن بيت بيروتي عمرو ١٥٠ سنة وصار كافيه بقعدة تراثية ع الموديل القديم. بتلاقوا الحب بكل تفاصيلو هالبيت، من الحلويات الشهية، فنجان القهوة ع البلكون، أو القعدة بالجنينة السرية اللي رح تنسيكن إنكن ببيروت، 

3. ليفانت، الجميزة

لكل محبي الحلويات الشرقية، والأجواء البيروتية، رح تنغرموا بكافيه ليفانت بالجميزة! تفاصيلو قديمة وبسيطة، بتحكي عن بيروت من زمان، بالديكور، الكتب، ركوة القهوة العربية، والحلويات الشرقية ع أنواعها!

4. كافيين ١٩٢٢، مار الياس

كافيين واحد من أقدم الكافيهات البيروتية وصرلو فاتح من سنة ١٩٢٢. اللي بيميز هالمحل انو بيقدم قهوة مختصة ع لمسات مميزة من أيام زمان. 

5. رصيف بيروت – شارع جبري دومط، الحمرا 

رصيف بيروت مساحة بتحسّسكن بدفى بيروت من أيام زمان. قعدتو قديمة، لقمتو طيبة، ومقصد حلو للسهرات!

الرقم: 081 340 01 

6. بيت ست الكل، حمانا

جربوا الأكل الطيب مع القعدة القديمة والأجواء الثقافية بنص حمانا، ولما تخلصوا عملوا برمة ع الضيعة!

الرقم: 345 469 76

7. قهوة السوق، بعقلين

هالقهوة الأثرية بتطل ع أسواق بعقلين، وبين لعب الطاولة وقرعة متة، كتير رح تنبسطوا بهالمحل!

الرقم: 632 889 78

8. صالون زحلة، زحلة

الحجر القديم وجمال البيوت اللبنانية ورشفة قهوة رح يجذبوكن بهالكافيه اللطيف!

9. جلسة العين، بيت شباب

بمشواركن ع ضيعة بيت شباب، جربوا الصاج عند كافيه العين، مع القعدة التراثية بالسوق ولعبة طاولة، رح بتقضوا أجمل الأوقات. 

الرقم: 790 157 79 

10. قهوة ٦٠، طريق صيدا البحري

إرجعوا ع فترة الستينات عند قهوة ٦٠ ع ساحل صيدا. هالكافيه مشرفة ع البحر، عندها جو بيتوتي، مونة بلدية، طبخات متل طبخات التيتا وترويقة أشكال وألوان. وفوق هيك، بيعملوا سهرات عود لتكمل معكن قعدة أيام زمان. 

الرقم: 000 196 79

11. باب السراي كافيه، سوق صيدا القديم

إذا فيه شغلة مشهورة فيها صيدا هي السوق الشعبي والأجواء القديم، وما في أحلى من كافيه باب السراي لتعيشوا هالجو ع أطيب ترويقة حمص وفول! ولما تخلصوا، عملوا برمة بالأسواق ودوقوا الحلو الصيداوي!

الرقم: 444 640 81 

شوفوا كمان، شوفوا ٦ كافيهات مع قعدة جنينة ساحرة ببيروت