إفطار عند عمو أنيس ب ٨ دولار، مشوا على هالمطعم المتواضع!

بتصدقوا إذا خبرناكن إنو فيكن تدوقوا إفطار طيب وغني بس ب ٨ دولار؟ مطعم عمّو أنيس مطعم متواضع بشارع كومودور بالحمرا عندو لقمة بيتوتية طيبة. ومجرد ما تزوروا المحل رح تنتبهوا أديه عمو أنيس، صاحب المطعم، عندو روح حلوة!

بتدخلوا على المطعم قعدتو بسيطة ع أيام زمان ومطبخو مفتوح لكل الناس. وع أد هضامتو لعمو أنيس، ع قد ما إنشهر ع السوشيال ميديا وإنحب أكتر وأكتر! وفعلاً هيك، عمو أنيس رح ياخدكن ويجيبكن بحكياتو المهضومين! بيعمل الأكل قدامكن، وبونّسكن بالأحاديث اللي ما بتخلص، عنجد أد ما عندو حسّ ضيافة رح بتحسوا حالكن بالبيت!

وأكتر شي لفت الزوار عندو انو أكلو مش بس طيب، بس كمان أسعارو رخيصة ومناسبة، يعني مطعمو لكل الناس! وفوق هيك، عطول بيعمل عروض حلوة، خصوصي للإفطار هلق بشهر رمضان، بتلاقوا سفرة إفطار شهية وكاملة ناطرتكن بس ب ٨ دولار! 

بيقدم مطعم عمو أنيس صحون كريمة من أكتر من ٤٠ طبق لبناني ع الطريقة التقليدية البيتوتية. الفتة، الكشك، الحمص، القاورما، الطبخات اللبنانية متل الكفتة بالصينية والكبة، الأكلات البيروتية، الأطباق الشامية، السلطات التراثية، والمازة الشهية، انتو نقوا واستحلوا! وأكيد، بيعملكن الوصفات التقليدية ع طريقتو وبيضفى عليها لمستو الخاصة ليتميز عن غيرو وانتو تنبسطوا بكل لقمة بلقمتها!

بتلاقوا مطعم عمو أنيس بشارع الكومودور بالحمرا، تحديداً جنب أوتيل كومودور ومقابل أوتيل كورال. وللمزيد من المعلومات، اتصلوا على الرقم: 131 925 03. 

شوفوا كمان، مشوار تراثي عند عمو أمين، من أقدم لحامين بلدنا!