شو قصة الكبة الحزينة؟ بتنعمل نهار الجمعة العظيمة

سامعين شي بالكبة الحزينة؟ أكيد مجربين الكبة المشوية والكبة النية والكبة بالصنية، بس الكبة الحزينة قصة تانية! الكبة الحزينة أو كبة الراهب أو الكبة الكذابة، أكلة خاصة عند الموارنة بلبنان، وبتتحضر نهار الجمعة العظيمة.

ليش هالاسم الحزين يا ترى؟

يوم الجمعة العظيمة هوي أقدس يوم بالسنة عند المسيحيين، وفي كتير زهد وروحانية. عادةً، المسيحيين ما بياكلوا لحمة يوم الجمعة، بس المضطهدين عرفوا بهالشي، لهيك من رحم الأحزان ولدت هالكبة.

^{Credits: annahar}

بتقول الخبرية إنو بس عرفوا العثمانيي إنو الموارنة ما بياكلو لحمة نهار الجمعة فرضوا علين أكل اللحمة وكان بوقتها يوم الجمعة العظيمة! رفضوا ياكلوا لحمة بس فكروا بطريقة ذكية يخلصوا من الموضوع، فخدعوهن المسيحيين بكبة اللقطين أو الكبة الحزينة ولهيك سموها البعض “كبة كذابة” لأنها كذابة ما فيها لحمة.

بوقت الإضطهاد ابتكروا الموارنة كبة بدون لحمة! كبة من طحين وبرغل وحشيش مر، رمز لمرارة آلام السيد المسيح.

شو مكونات الكبة الحزينة؟

^{Credits: Ainkfaa}

برغل، طحين، ملح، عشب مر، بصل، حمص، دبس الحصرم (العنب الحامض)، وسماق. وهيك ضلت هالعادة تتوارث من جيل لجيل وصارت رمز للعيد وبركة كل بيت وعيلة وصارت العيل ما تاكل بنهار الجمعة العظيمة غير كبة حزينة.

مين بيحضرها؟

نسوان الضيعة هني يلي كانوا يتجمعوا ويحطوا إيدن بهالطبخة، وكانت تكون عملية تحضير الكبات بهدوء وبتلاوة الصلوات من دون حكي.

^{Credits: annahar}

ليش هيدا الصمت كلو؟

^{Credits: EmileSabbagh}

ما بيستعملوا الجرن الصخري والمدقة الخشبية كرمال ما يطلع صوت من الجرن، صوت الفرح. الكبة الحزينة رمز للزهد والحزن خصوصي إنو نهار الجمعة العظيمة الكل بكون محزون!

شو أنواع الكبة الحزينة الموجودة؟

في كبة البرغل وكبة القرع.

شو حكاية كبة اللقطين؟

اللقطين بيستخدم بديل للبرغل ببعض المناطق والضيع بهيدا النهار، يعني فينا نقول كل حدا بيعمل الكبة حسب شو متوفر عندو بالبيت.

شو أهمية الكبة الحزينة؟

^{Credits: Jbeildailynews}

هيدي أكلة بتحمل رمزية دينية مهمة، بتعبر عن إيمان المسيحيين وصمودن.

بعد ما عرفتوا قصة الكبة الحزينة، رح تجربوا هالصنف الغريب؟

شوفوا كمان، أكلات غريبة نعملها بلبنان سامعين فيها؟