بتعرفوا شو أقدم مدينة بلبنان؟

كلنا منعرف إنو لبنان بلد الحضارات، بلد الحرف، التجارة، و مسكون من آلاف السنين قبل الميلاد. ان في شعوب سامية بهالأرض من أول ما تكون الإنسان، هني جدودنا يلي علمونا التجارة، اللغات، العمارة وغيرهن كتير.

وهني يلي وجدو وعمروا أول مدينة نسكنت من الإنسان بلبنان! شو هي يا ترى؟

جبيل! هالمدينة يلي كلنا منعشقها وناطرين الصيفية مناطرة لننزل نتمشى على سنسولها العتيق ونشم هواها الحلو وناكل من بوظة النشواتي ونرجع نقعد بالحديقة ونتصور… هي أقدم مدينة بلبنان!

تعو نرجع بالزمن شوي و نعمل جولة سياحية تاريخية على جبيل و تاريخها العريق.

بحسب تقرير “اليونسكو” من 5000 سنة قبل الميلاد، سكن الإنسان جبيل وترك بصماتو على مر العصور. هالمدينة الساحرة اللي بتبعد 40 كيلومتر عن بيروت، انعرفت عند اليونانيين بإسم “بيبلوس” وكانوا يستوردوا منها ورق البردي، الورق يلي كانوا يستعملوا للكتابة.

ومن كلمة “بيبلوس” تسمى الإنجيل “البيبل” أو The Bible وبيعني الحرف أو الكلمة.

ولكن أهمية جبيل ما توقفت هون. هون بجبيل، ولدت الأبجدية الفينيقية أساس كل الأبجديات وأول أبجدية استخدمت على نطاق واسع بالعالم. فكرو فيها قدي شي مهم!

الحروف و الكلمات اللي عم نقراها ونستعلها اليوم انطلقت من مدينة جبيل، جذورها راجعة لأبجدية ابتكروها الفينيقيين بهالمدينة العريقة.

اليوم، صارت جبيل وجهة سياحية وثقافية مميزة مش بس للبنانية والمغتربين وحتى للسواح يلي جايين من كل بلدان العالم، فيها مزيج رائع من المواقع الأثرية اللي بتحكي عن تاريخها العريق، شواطئ ساحرة، و مطاعم وأوتيلات ساحرة من أبرزها مطعم “أدوناي“، “فينيقيا“، “سابوري إي فيني” وفندق “أحيرام” فندق “بيبلوس سور مير” وغيرن كتير.

من أهم معالم جبيل اللي ما لازم تقفوها:

قلعة جبيل: بناها الصليبيون بالقرن الـ12، و دمرها صلاح الدين بس لحسن الحظ أعيد بناؤها من جديد بعد استيلاء الصليبيي على المدينة من جديد. موقع القلعة مميز لأنو بالبحر، جنب معابد عتيقة ومسرح روماني، وبطل على منظر من الخيال خاصةً وقت مغيب الشمس.

متحف الشمع: بيحتوي على أبرز الشخصيات اللبنانية التاريخية المعمولة بالشمع.

سنسول جبيل: ملتقى الحضارات القديمه والجديدة، ومحاوط بالمطاعم وبالشخاطير، ما فيكن تزوروا جبيل من دون ما تمرقوا في.

سوق جبيل العتيق: أجمل سوق أثري ممكن تزوروا بلبنان، مليان مطاعم وبارات ومحلات تراثية ومزارات دينية وموسيقى وبعج بعجقة الناس والزوار.

تعو نكتشف جبيل أكتر و نتعمق بتاريخها و نستمتع بجمالها الساحر بهالمقال.