أشهر المسلسلات اللبنانية لي تحولت لأفلام سينما!

ما شتقتوا للدراما اللبنانية؟ الفترة الأخيرة صارت موضة يعملوا مسلسلات مشتركة لدرجة صرنا نشتاق نشوف مسلسل لبناني وبس، لهيك حبينا اليوم نتذكر أشهر المسلسلات اللبنانية يلي تحولت لأفلام سينما.

تعوا شوفوا معنا شو أهم المسلسلات اللبنانية يلي كنا كلنا نتابعها على شاشة التلفزيون وبعدين نزلت بالسينما.

١. بنات عماتي وبنتي وأنا

هيدا المسلسل الضارب اللي أبطالو ورد الخال ويورغو شلهوب عام ٢٠٠٢ فات على قلب كل بيت لبناني. قصتو بتحكي عن ست مطلقة عايشة مع بنتها وبنات عماتها بنفس البيت. طبعاً ما بتخلص القصة هون لأن بعدها ورد علقانة بقصة حب مع جوزها السابق لي هوي يورغو، وبالآخر بيرجعوا لبعض وبيعملوا عرس تاني. الناس كتير حبوا المسلسل وشخصياتو واستهضموهن فطبيعي إنو يقرروا يعملوا منو فيلم.

٢. غنوجة بيا

غنوجة بيا، المسلسل الكوميدي الطريف يللي لعبت في ريتا برصونا وبيتر سمعان دور البطولة، بيحكي عن قصة حب بتجمع بين رنا وطارق ولا مرة بتكمل، مرفق بأحداث كوميدية ومغامراة شيقة، صار فيلم وكسر الأرض بوقتها ما بقي حدا ما نزل على السينما ليحضروا.

٣. مدام بامبينو

“مدام بامبينو” فيلم كوميدي يلي نجمتو كارين رزق الله والممثل فادي شربل، ضحك الناس كتير بمشاكل ومنافسات مضحكة بين الزوجين عقصة ترشح كارين رزق الله على منصب نيابي لدرجة بقرر جوزا ينفصل عنا وليضل قريب من الولاد ومنا بيعمل حالو المربية مدام بامبينو، وهوي كمالة لمسلسل” عيلة ع فرد ميلة” لي يعتبر من أكتر المسلسلات الكوميدية المحبوبة لي قدم جرعة كوميديا قوية للجمهور.

٤. أس أل شي

بس نحكي عن الأفلام اللبنانية ما فينا ما نذكر “أس أل شي”. هيدا البرنامج منو مسلسل بس كان جزء من طفولتنا وكنا ننطرو كل جمعة، بطولة عادل كرم وناتالي نعوم وفادي رعيدي وغيرن، كان ما في بيت بلبنان ما يتابع مقاطعو الساخرة والمضحكة. وطبيعي إنو مع نجاحو الكبير، يتحول لفيلم ينقل الفرح للناس بنفس الأسلوب الكوميدي على الشاشة الكبيرة.

٥. حلوة وكذابة

حلوة ويمكن كتير كذابة! هيدي هي شخصية داليدا خليل يلي لعبت دور البطولة بالمسلسل “حلوة وكذابة” إلى جانب الفنان زياد برجي، كتابة كارين رزق الله. هيدا المسلسل الإجتماعي اللبناني حكي عن قصة حب بين شخصين من طبقتين إجتماعيتين مختلفتين، واجهوا كتير صعوبات بهيدي العلاقة. المسلسل حاز على نسبة مشاهدة عالية وقت عرضو، وكتير من الناس انجذبوا لقصة الحب الرومانسية الطريفة بين داليدا وزياد. فبعد سنة من عرضوا، صار فيلم سينما خلا العشاق يستمتعوا بهاي القصة على الشاشة الكبيرة كمان.

شوفوا كمان، أشهر شخصيات “كيف وليش”: وين صاروا اليوم ؟