حلّوا مناسبات آذار بورشات فنية عند Kanvartfuly!

مخبى بقلب شارع الحمرا مساحة فنية أكتر من رائعة، بترحب بكل الفنانين المبتدئين و الأشخاص المبدعين. خلونا نعرفكن على كانفارتفولى أو Kanvartfuly، مطرح مميز تم إنشاؤه من قبل ناس عندن هدف حلو مشترك: نشر السعادة من خلال الفن، وبنفس الوقت بطريقة تكون متاحة للكل.

كيف بلش Kanvartfuly؟

تلات إخوة بنات مع رفيقكن المقرب قرروا يفتحوا مشروع حلو وزغير سنة ٢٠٢٣، هالمشروع بيعبر عن حبّن للفن وحماسن للإبداع بلبنان، ومن قلب واحد من أكتر الشوارع الفنية والمشهورة بالبلد: شارع الحمرا. 

معرض Kanvartfuly بيستقبل الفنانين من كل المستويات وبيقدملن تشكيلة مميزة من الورش الفنية. الهدف مش بس تطوير مهاراتكن الفنية، وإنّما كمان تعزيز الشعور بالانتماء للمجتمع. ورش العمل بتتضمن تطريز على القماش، النحت بالطين، صناعة الشموع، تزيين الكيك، وأكتر من هيك. وكمان بيقدمولكن هالمساحة الحلوة لتقدروا تعملوا حفلات عيد الميلاد أو أي مناسبة من مناسباتكن الخاصة!

ورشات فنية ناطرتكن ع أحلى المناسبات ببيروت!

وتحديداً بشهر آذار، Kanvartfuly محضرلكن برنامج مميز بيتضمن كتير من الEvents والورشات الخاصة، وكل وحدة تحت إطار مناسبة مميزة هالشهر.

لشهر رمضان

بما انو دخلنا على شهر رمضان المبارك، رح يقدملكن هالمحل جو ممتع من التعبير الفني والاحتفال الثقافي. رح تقدروا تشاركوا بورشة تلوين الأشكال الرمضانية، وكمان صنع الفوانيس التقليدية، وأكتر.

لعيد الأم

إذا انتوا إمات عم تفتشوا ع وقت ترتاحوا فيه، أو انتو عبالكن تقضوا وقت مع إمّكن بتجربة ممتعة، Kanvartfuly إختارولكن ع عيد الأم أنشطة فنية مريحة، متل الفن التنقيط ع المرايا أو الرسم على القمصان.

لعيد الفصح

اللي متحمسين للاحتفال بالفصح المجيد رح يحبوا هالبرنامج اللي بيحتوي ع ورش العمل المخصصة للعيد، وبتشمل هالورشات الرسم على البيض وزخرفة الشموع.

عند Kanvartfuly الفن أكتر من هواية…

هدف Kanvartfuly انو يثبت انو الفن أكتر من مجرد هواية، هو فرصة لخلق ذكريات حلوة وبنفس الوقت تطوير مهارات علاجية مريحة نفسياً تقدروا تستفيدوا منها!

للمزيد من المعلومات، فيكن زيارة صفحتن على إنستغرام أو التواصل معن عبر واتساب على

الرقم 620 902 78. بتلاقوا المحل بشارع مي زيادة، سبيرز. اضغطوا هون لمعرفة الموقع بالزبط.